Idman.biz
Polşanın paytaxtı Varşavada keçirilən açıq Avropa turnirində Azərbaycan cüdoçusu Camal Feyziyev uğurlu çıxışı ilə diqqət çəkib.
İdman.Biz xəbər verir ki, +100 kq çəki dərəcəsində mübarizə aparan idmançımız yarışı mükafatçılar sırasında başa vurub.
Bütün rəqiblərini üstələyərək finala qədər yüksələn Camal Feyziyev həlledici qarşılaşmada məğlub olaraq gümüş medalla kifayətlənib.
Bu nəticə ilə cüdoçumuz beynəlxalq arenada növbəti nailiyyətini aktivinə yazdırıb.
17:56
Polşanın paytaxtı Varşavada böyüklər arasında keçirilən "Warsaw European Open 2026" turniri başa çatmaq üzrədir. Azərbaycan cüdoçuları yarışın son günündə uğurlu çıxışları ilə diqqət çəkiblər.
İdman.Biz xəbər verir ki, +100 kq çəki dərəcəsində mübarizə aparan Camal Feyziyev bütün rəqiblərini məğlub edərək turnirin finalına vəsiqə qazanıb. O, həlledici qarşılaşmada qızıl medal uğrunda mübarizə aparacaq.
Olimpiya Oyunlarının mükafatçısı Elmar Qasımov (100 kq) isə yarımfinal mərhələsində rəqibinə uduzaraq finalın bir addımlığında dayanıb. Təcrübəli cüdoçumuz fəxri kürsünün üçüncü pilləsi uğrunda təsəlliverici görüşə qatılacaq.
Qeyd edək ki, yarışın son günündə tatar üzərinə Azərbaycanın 5 təmsilçisi çıxıb. Onlardan Gülnarə Bayramova (57 kq) ilk mərhələni keçsə də, 1/8 finalda məğlub olub. Hazırda yığmamızın aktivində bir bürünc medal var. 27 ölkədən 370-ə yaxın idmançının qatıldığı turnirə bu gün yekun vurulacaq.
11:49
Polşanın paytaxtı Varşavada cüdo üzrə böyüklər arasında keçirilən Avropa Açıq Turnirinə (Warsaw European Open 2026) bu gün yekun vurulacaq. Yarışın ikinci - sonuncu günündə Azərbaycanın daha beş cüdoçusu mükafatlar uğrunda mübarizə aparacaq.
İdman.Biz xəbər verir ki, turnirin son günündə kişilər arasında Xəyyam Əliyev və Nihad Şıxəlizadə (hər ikisi 90 kq) qüvvəsini sınayacaq. Əliyevin rəqibi fransalı Aleksa Mitroviç, Şıxəlizadənin rəqibi isə Niderlanda tımsilçisi Den Hartoq Florisdir.
Elmar Qasımov (100 kq) Polşa təmsilçisi Mateus Vaçko ilə qarşılaşacaq. +100 kq çəki dərəcəsində mübarizə aparacaq Camal Feyziyev isə Almaniya təmsilçisi Marvin Belzlə döyüşəcək.
Qadınların yarışında isə Gülnarə Bayramova (57 kq) Malina Klaret Vilsonla (İspaniya) münasibətlərə aydınlıq gətirəcək.
Qeyd edək ki, turnirin ilk günündə Azərbaycan yığması bir medal qazanıb. 66 kq çəki dərəcəsində mübarizə aparan Tofiq Məmmədov bürünc medala sahib çıxıb. Ümumilikdə 19 cüdoçu ilə təmsil olunduğumuz yarışda 27 ölkədən 320 idmançı iştirak edir.
