Idman.biz
"Bakıdan çıxanda hiss etdim ki, vəziyyətim getdikcə pisləşir".
Bu sözləri bir neçə gün öncə zəhərlənən və bu səbəbdən Yaponiyada keçirilməsi planlaşdırılan Rizin turnirində iştirak edə bilməyən azərbaycanlı MMA döyüşçüsü Vüqar Kərəmov deyib.
O, offsideplus.az-a açıqlamasında hazırda özünü nisbətən yaxşı hiss etdiyini bildirib:
"Bakıda təyyarəyə minəndə halım yaxşı deyildi. Bir qədər sonra isə ürəyim bulanmağa başladı. Yaponiyaya çatanda isə vəziyyətim daha da pisləşdi. Yoxlanışdan keçəndə həkimlər dedi ki, zəhərlənmisən. Döyüşməyə icazə vermədilər. Xeyirlisi. Ümid edirəm ki, tezliklə sağalıb, döyüşlərə qayıda biləcəyəm".
Qeyd edək ki, Vüqar Kərəmov bu gün yaponiyalı rəqibi Koyomi Matsuşima ilə döyüşməli idi.
Təmsilçimiz Rizin təşkilatında keçirdiyi 10 döyüşün 7-də qələbə qazanıb.
