Idman.biz
"Döyüşə hazırlıqlar yaxşı gedir".
Bunu İdman.biz-ə Azərbaycanın və "Qəbələ" İdman Klubunun MMA döyüşçüsü Vüqar Kərəmov deyib.
O, "Rizin" turnirində keçirəcəyi növbəti qarşılaşmanı şərh edib. Kərəmov bildirib ki, görüşdə əsas hədəfi qələbə olacaq: "Bir ay öncədən təlim-məşqə başlamışıq. Hazırda Dubaydayam. Məşqlərimiz üç həftə davam edəcək. Daha sonra Bakıya qayıdıb çəkimi salacam. İyunun 10-da isə Yaponiyaya yarışa yola düşəcəyik".
66 kq çəki dərəcəsində yarışacaq təmsilçimiz rəqibi yaxşı analiz etdiyini deyib: "Artıq bir həftədir ki, kiminlə döyüşəcəyimiz haqqında məlumat almışıq. Biz də bu müddətdə rəqibin döyüşlərini izləyib lazımi şəkildə analiz etmişik. Rəqibim Yaponiya təmsilçisi Syuya Kimuradır. O, keçirdiyi beş döyüşün hamısında qalib gəlib. Əsasən ayaqüstə işləməyi xoşlayır. Bütün döyüşlərini birinci raundun ilk dəqiqələrində qalib gəlib. Ümid edirəm, bu qarşılaşmada qalib gəlib kəmər uğrunda döyüşmək şansı qazanacam".
Qeyd edək ki, MMA qaydaları üzrə keçiriləcək yarışın iyunun 14-də Sapporoda (Yaponiya) təşkili planlaşdırılır. Kərəmov "Rizin" çərçivəsindəki 9 döyüşdə 6 qələbə qazanıb. Ümumilikdə isə idmançımız 26 qarşılaşmada 20 dəfə qalib gəlib.
Aytac Sahəd
İdman.biz
