Idman.biz
Bakı Apellyasiya Məhkəməsində xuliqanlıqda təqsirləndirilən kikboksçu Tülin Ələkbərovanın barəsindəki hökmdən apellyasiya şikayəti üzrə məhkəmə iclası yekunlaşıb.
İdman.Biz Pravda.az-a istinadən xəbər verir ki, hakim Murad Məmmədovun sədrliyi ilə keçirilən prosesdə qərar elan olunub.
Qərara əsasən, apellyasiya şikayəti təmin edilməyib.
İttihama görə, kikboksçu Tülin Ələkbərova restoranda qadını döyərkən sərxoş olub.
Hadisə "Burju Baku" restoranında baş verib.
Belə ki, Tülin Sevda adlı tanışı və iki oğlanla restorana istirahət etməyə gəliblər. Tülin spirtli içki qəbul etdikdən sonra halı pisləşib. Tülin Sevda ilə birlikdə sanitar qovşağa gediblər. Tülin içəri daxil olanda Sevda qapıda dayanaraq heç kimin içəri girməsinə icazə verməyib.
Bu zaman sanitar qovşağa gələn zərərçəkmiş Kəmalə adlı xanım içəri daxil olmaq istəyib. Lakin Sevda ona icazə vermədiyi üçün Kəmalə ilə aralarında mübahisə baş verib. Səs-küyə qapını açan Tülin Kəmaləyə yumruq və təpik zərbələri endirib.
Təqsirləndirilən Tülin deyib ki, hadisə zamanı sərxoş olub və Kəmalənin Sevdanı yerə yıxdığını gördüyü üçün ona bir yumruq zərbəsi vurub.
Kəmalə isə ifadəsində deyib ki, hadisə vaxtı Sevda ondan sanitar qovşağa getməməsini istəyib. Kəmalə bildirib ki, bir neçə dəqiqə gözləsə də sonra vəziyyəti pis olduğu üçün sanitar qovşağa keçmək üçün Sevdanı itələyib. Bu zaman mübahisə yaranıb. Tülin sanitar qovşaqdan çıxaraq ona yumurq zərbələri vurub. Yerə yıxılan zaman isə təpiklə ona zərbələr endirib.
Zərərçəkmiş Kəmalə Tülindən 5 min manat pul tələb edib. Bildirib ki, aldığı xəsarətlərdən sonra da bir müddət də işləmədiyi üçün ona maddi ziyan dəyib. Zərərçəkmiş şəxs Tülindən şikayətçi olduğunu deyib.
Məhkəmə araşdırması zamanı məlum olub ki, hadisədən sonra Tülin həbs edilib. İki gün həbsdə qaldıqdan sonra onun barəsində polis nəzarətinə verilmə qətimkan tədbiri seçilib.
Nərimanov Rayon Məhkəməsi Tülin Ələkbərovanı xuliqanlıqda təqsirli bilib və 6 ay müddətinə azadlığın məhdudlaşdırılması cəzası təyin edib.
