Sərxan Əliyev Dünya Çempionatı Ərəfəsində: Rəqiblərimin döyüşlərinə baxmıram

Bu gün Birləşmiş Ərəb Əmirliklərinin Dubay şəhərində boks üzrə dünya çempionatı start götürəcək.

Azərbaycanı yarışda təmsil edəcək Sərxan Əliyev (70 kiloqram) turnirə hazırlıq və hədəfləri ilə bağlı AZƏRTAC-a müsahibə verib.

- Birləşmiş Ərəb Əmirliklərinin Dubay şəhərində boks üzrə dünya çempionatına start verilir. Mundiala hazırlıq necə keçdi?

- Dünya çempionatına hazırlığımız yaxşı keçdi. Ötən ay Özbəkistanda təlim-məşq toplanışda olduq. Buradakı hazırlıq prosesimiz yaxşı təşkil olunmuşdu. Sonra İslam Həmrəyliyi Oyunlarında uğurla iştirak etdik. Bu yarışdan yaxşı formada çıxdıq. Üzərimizdə daha çox işləmişik.

- Azərbaycan millisinin şanslarını necə qiymətləndirirsiniz?

- Kollektiv yaxşı durumdadır. Heyət gənc və təcrübəli simalardan ibarətdir. Fikrimcə, komanda olaraq yaxşı nəticə əldə edəcəyik.

- 2021-ci ildə Serbiyanın paytaxtı Belqrad şəhərində təşkil edilən dünya çempionatında bürünc medal qazanmışdınız. Necə düşünürsünüz, bu yarışda medal əyarını dəyişə bilərsiniz?

- Bəli, həmin yarışda böyüklər arasında ilk medalımı qazanmışdım. Düşünürəm ki, minimum bürünc medal qazanmalıyam. Ən böyük hədəfim isə qızıldır.

- Turnirdə potensial rəqiblərinizi necə dəyərləndirirsiniz? Xüsusi izlədiyiniz və analiz etdiyiniz rəqiblər varmı?

- Düzünü desəm, rəqiblərimin görüşlərinə baxmamışam. Döyüşlərdən əvvəl mənə qarşı mübarizə aparacaq idmançıları izləməyi xoşlamıram. Hər ikimiz insanıq. Hansı rəqibin olması mənə fərq etmir.

- Dünya çempionatından sonra karyeranıza dair növbəti böyük hədəfiniz nədir?

- Dünya çempionatında sonra böyük yarışımız yoxdur. Bu il çoxlu turnirlərə qatıldıq. Hədəfim dünya çempionatında müsbət nəticə göstərib, daha sonra dincəlməkdir.

İdman.Biz