Idman.biz
Xəbər verildiyi kimi, qadın boksçumuz Gülər Hüseynova (48 kq) MDB Oyunlarının qalibi olub.
İdman.biz ABF-yə istinadən bildirir ki, onun nailiyyəti MDB Oyunlarında Azərbaycan boks tarixinə ilk qızıl medal kimi düşüb.
Ümumi nəticədə bir qızıl, beş gümüş və dörd bürünc mükafat əldə edən boksçularımız MDB Oyunlarında həm medalların əyarında, həm də sayında yeni rekord müəyyənləşdiriblər.
17:05
Azərbaycanın ev sahibliyi etdiyi III MDB Oyunlarında qız boksçuların mübarizəsinə yekun vurulub.
İdman.biz bildirir ki, millimiz Yevlax Olimpiya İdman Kompleksində təşkil olunan turniri 1 qızıl, 5 gümüş və 4 bürünc medalla başa vurub.
Baş məşqçi İlkin Ağayevin rəhbərlik etdiyi komandada Gülər Hüseynova (48 kq) Oyunların qalibi adına yiyələnib. O, bu gün keçirilən final döyüşündə Darya Qavrinanı (Rusiya) məğlub edib. Rəqibinə 4:1 (29:28, 28:29, 29:28, 30:27, 30:27) hesabı ilə qalib gələn boksçumuz fəxri kürsünün ən yüksək pilləsinə qalxıb.
III MDB Oyunlarında digər boksçularımızdan Aysel Fərəcova (46 kq), Əminə Tağı (50 kq), Cəmilə Muradlı (54 kq), Aynur İsmayılova (60 kq), Fidan Bakarova (63 kq) gümüş, Aylin Nəzərova (46 kq), Zəhra Məmmədova (52 kq), Azərpur Mirruqəyya (57 kq) və Səma Abbasova (66 kq) MDB Oyunlarında bürünc medal qazanıblar.
Nəticədə bokçularımız bir qızıl, beş gümüş və dörd bürünc mükafat əldə ediblər.
Qeyd edək ki, yarışın son günündə – oktyabrın 5-də isə oğlan boksçularımız final döyüşünə çıxacaqlar.
Artıq aktivində 9 bürünc medal olan bu komanda 5 çəkidə final qarşılaşmasında qızıl medal uğrunda mübarizə aparacaq.
15:18
Azərbaycanın iki boksçusu III MDB Oyunlarında medal qazanıb.
İdman.biz xəbər verir ki, Gülər Hüseynova (48 kq) bütün rəqiblərinə qalib gəlib və qızıl medala sahib çıxıb.
Qeyd edək ki, Aysel Fərəcova (46 kq) yalnız finalda uduzduğu üçün gümüş medalla kifayətlənib.
14:25
MDB Oyunlarında qızlar arasında boks yarışlarının final mərhələsi başlayıb.
İdman.biz xəbər verir ki, Aysel Fərəcova 46 kiloqram çəki dərəcəsində final döyüşündə rusiyalı Viktoriya Klimova ilə qarşılaşıb.
Gərgin keçən görüşdə idmançımız rəqibinə məğlub olaraq turniri gümüş medalla başa vurub.
10:15
Bu gün III MDB Oyunlarının boks yarışlarında qadınlar arasında final döyüşləri keçiriləcək.
İdman.biz xəbər verir ki, Yevlax Olimpiya İdman Kompleksində keçiriləcək döyüşlərdə Azərbaycan millisinin 6 təmsilçisi qızıl medal uğrunda rinqə çıxacaq.
Final görüşlərində ölkəmizi Aysel Fərəcova (46 kiloqram), Gülər Hüseynova (48 kiloqram), Əminə Tağı (50 kiloqram), Cəmilə Muradlı (54 kiloqram), Aynur İsmayılova (60 kiloqram) və Fidan Bakarova (63 kiloqram) təmsil edəcəklər.
Qeyd edək ki, daha əvvəl Aylin Nəzərova (46 kiloqram), Zəhra Məmmədova (52 kiloqram), Mirrüqəyya Azərpur (57 kiloqram) və Səma Abbasova isə (66 kiloqram) yarımfinalda məğlub olduqları üçün bürünc medalla kifayətləniblər.
