Idman.biz
Azərbaycanlı qarışıq döyüş növləri (MMA) ustası Asəf Çopurov etiraf edib ki, Əbu-Dabidə keçirilən "UAE Warriors" turnirində çempionluq kəməri uğrunda döyüşdə qələbə ona o qədər asan başa gəlib ki, hətta qarşılaşma zamanı Həbib Nurməhəmmədovla bir-birinə təbəssüm də etməyə fürsət tapıb.
İdman.Biz-in məlumatına görə, Azərbaycan təmsilçisi Əbu-Dabidə keçirilən "UAE Warriors" turnirində yüngül çəki dərəcəsində titul döyüşündə Cənubi Afrikalı döyüşçü Demarte Penyaya qarşı inamlı qələbə qazanıb.
"Bizim planımız onu təzyiq altında saxlamaq və bütün raundlar boyu üstünlük nümayiş etdirmək idi. Hər şey planlaşdırdığımız kimi alındı. Üçüncü raund başa çatdıqdan sonra – hansı ki, sonuncu oldu – özüm də təəccübləndim ki, heç yorğunluq hiss etmədim. Döyüş zamanı hətta Həbib Nurməhəmmədovla bir-birimizə təbəssüm də etdik. Yəqin ki, bu, hər şeyi tam nəzarətimdə saxladığım yeganə döyüş idi", - Çopurov "Vestnik MMA" "YouTube" kanalına müsahibəsində deyib.
O, həmçinin Həbib Nurməhəmmədovla aralarında yaşananların nədən ibarət olduğunu da açıqlayıb.
"Gülümsədim və ona göz vurdum, o isə əl çalaraq qarşılıq verdi. Düşünürəm ki, yadında qaldım" - döyüşçü qeyd edib.
Qeyd etmək lazımdır ki, titul döyüşündə beş raund planlaşdırılmışdı, lakin Cənubi Afrikalı döyüşçü üçüncü raunddan sonra mübarizəni davam etdirməkdən imtina edib.
"Bir epizodda o, məni ayaq zərbəsi ilə bədənə vurmaq istədi, amma mən həmin zərbəni dirsəklə çox sərt qaytardım. Bundan sonra onun addımı da ləngidi, tempi də azaldı, həm də dözümlülük baxımından onu üstələdim. Hesab edirəm ki, hansısa anda ruhdan düşdü, çünki raundlar arasında o, küncdə otururdu, mən isə ayaq üstə dayanmışdım, gəzir, dostlarımla danışır, hətta onları sakitləşdirməyə də vaxt tapırdım. Beləcə, hər şey əla keçdi", - Çopurov bildirib.
Azərbaycanlı döyüşçü həmçinin UFC-yə keçid perspektivlərindən də danışıb.
"Çox ümid edirəm ki, menecerim Rubi (döyüşçünün meneceri Daniel Rubenşteyn – red.) nəhayət işə başlayacaq. Allah qoysa, bəlkə gələn il ora düşərəm, bəlkə də bu il, qısa müddətli xəbərdarlıqla (yəni döyüş iştirakçılarından biri son anda iştirak edə bilmədikdə – red.) ora çıxmaq imkanım olar. Mən hər zaman hazır oluram, qarşıda döyüş olsun, ya olmasın, fərq etmir - daim məşq edirəm. Sadəcə, bu prosesin özündən zövq alıram" - Çopurov vurğulayıb.
Bu arada döyüşçü etiraf edib ki, döyüşdən sonra özünü o qədər yaxşı hiss edir ki, artıq bu həftəsonu Əbu-Dabidə keçiriləcək "UFC 321" turnirində döyüşə çıxmağa və hər hansı bir idmançını əvəzləməyə hazırdır.
"Əgər hansısa döyüşçü zədələnərsə, mən onu əvəz etməyə hazıram. Məsələn, əgər Mario Bautista döyüşdən kənar qalsa, mən Umar Nurməhəmmədova qarşı çıxmağa hazıram. Kimlə döyüşəcəyim fərq etməz, mən hər an vuruşmağa hazıram", - Çopurov bildirib.
İdmançımız həmçinin etiraf edib ki, amerikalı PFL təşkilatı onunla müqavilə imzalamaq üçün UFC-dən üç dəfə çox məbləğ təklif edib.
"Mən pulun dalınca qaçmıram, çünki mənim bir arzum, bir məqsədim var və ona doğru gedirəm. Pul isə zamanla mütləq gələcək", - Çopurov əlavə edib.
Teymur Tuşiyev
