Idman.biz
Azərbaycanın "Gəncə" basketbol klubuna FIBA Avropa Kubokunun qrup mərhələsində Bolqarıstanın "Rilski Sportist" komandası ilə keçirilməli olan oyuna görə texniki məğlubiyyət verilib.
İdman.Biz xəbər verir ki, turnirin rəsmi təqvimində qarşılaşmanın nəticəsi Bolqarıstan təmsilçisinin xeyrinə 20:0 hesabı ilə göstərilib.
C qrupunun üçüncü turuna təsadüf edən görüş oktyabrın 21-də Bolqarıstanın Samokov şəhərində keçirilməli idi. Lakin Azərbaycan komandasının səfəri ilə bağlı yaranan problemlər səbəbindən matç baş tutmayıb.
FIBA hələ oktyabrın 19-da rəsmi açıqlama yayaraq qarşılaşmanın keçirilməyəcəyini və məsələnin FIBA Avropanın vahid hakiminin baxışına göndərildiyini bildirmişdi. Beynəlxalq qurum səfərlə bağlı çətinliklərin konkret səbəbini açıqlamamışdı.
Texniki nəticə qeydə alındıqdan sonra "Gəncə" C qrupunda sonuncu - altıncı pillədə qərarlaşıb. Komandanın hesabında bir qələbə və üç məğlubiyyət var.
Azərbaycan təmsilçisi cari mövsüm turnirdə yeganə qələbəsini oktyabrın 28-də qazanıb. Həmin gün "Gəncə" Portuqaliyanın "Sportinq" klubunu sensasiyalı şəkildə 69:67 hesabı ilə məğlub edib.
Komanda növbəti oyununu noyabrın 4-də Rumıniyada "Universitatya Krayova"ya qarşı keçirəcək.
Qeyd edək ki, FIBA Avropa Kubokunda hər qrupun ilk iki pilləsini tutan komandalar ikinci mərhələyə yüksəlirlər.
