Idman.biz
Azərbaycanın qadınlardan ibarət 3x3 basketbol millisi Tailandın paytaxtı Banqkokda keçirilən FIBA Çempionlar Kubokunda tarixi uğura imza atıb. Yığmamız yarımfinalda dünya basketbolunun nəhənglərindən olan ABŞ seçməsini məğlub edərək finala yüksəlib.
İdman.Biz xəbər verir ki, olduqca gərgin keçən qarşılaşma komandamızın 22:20 hesablı qələbəsi ilə başa çatıb. Bu qalibiyyətlə Azərbaycan millisi turnirin həlledici oyununda iştirak hüququ qazanıb.
Finalda rəqibimiz Kanada və Niderland komandaları arasındakı digər yarımfinal matçının qalibi olacaq.
09:55
Taylandın paytaxtı Banqkokda basketbolun 3x3 növü üzrə FİBA Çempionlar Kubokunun həlledici mərhələsi keçirilməkdədir. Turnirin sonuncu günündə yarımfinal və final oyunları baş tutacaq.
İdman.Biz xəbər verir ki, B qrupunda ikinci yeri tutan Azərbaycanın qadın millisi yarımfinalda ABŞ komandası ilə üz-üzə gələcək. Qarşılaşmanın Bakı vaxtı ilə saat 10:15-də başlaması planlaşdırılıb.
Yığmamızın heyətində Erika Karter, Tatyana Deniskina, Aleksandra Mollenhauer və Brianna Freyzer yer alıblar.
Digər yarımfinal cütlüyündə isə Kanada və Niderland seçmələri mübarizə aparacaqlar. Bu görüşlərin qalibləri finalda çempionluq uğrunda, məğlub tərəflər isə bürünc medallar üçün yarışacaqlar.
Qeyd edək ki, qrup mərhələsində basketbolçularımız Kanada (10:16), Tayland (21:8) və İspaniya (16:11) kollektivləri ilə qarşılaşıblar. Çempionlar Kubokunun qalibi olan komanda 2027-ci il dünya çempionatına, növbəti Çempionlar Kubokuna və 2028-ci il Los-Anceles Yay Olimpiya Oyunlarının təsnifat turnirinə birbaşa vəsiqə qazanacaq.
basketbol, FİBA, Banqkok, Azərbaycan millisi
