Idman.biz
"Turan" voleybol klubu yeni mövsüm öncəsi heyətini daha bir təcrübəli legionerlə gücləndirib.
İdman.Biz xəbər verir ki, Tovuz təmsilçisi Kuba milli komandasının sabiq hücumçusu Kenia Karkasesi heyətinə qatıb. 189 sm boya malik voleybolçu 2026/27 mövsümündə "Turan"ın formasını geyinəcək.
Beynəlxalq arenada zəngin təcrübəyə malik hücumçu karyerası ərzində Yaponiya, Kuba, İsveçrə, Braziliya, İtaliya, Yunanıstan və İndoneziya klublarında çıxış edib. O, "Volero Zürich", "Osasco", "Casalmaggiore", "Perugia", "Novara" və "Panathinaikos" kimi tanınmış komandaların da şərəfini qoruyub.
Karkases klub səviyyəsində müxtəlif ölkələrin çempionu olmaqla yanaşı, fərdi mükafatları ilə də diqqət çəkib. Kuba voleybolçusu FIVB klublararası dünya çempionatında iki dəfə ən yaxşı hücumçu seçilib, 2015-ci ildə Cənubi Amerika klublararası çempionatının MVP-si olub. O, 2023/24 mövsümündə isə Yunanıstan Liqasının ən yaxşı hücumçusu adına layiq görülüb.
Təcrübəli voleybolçu Kuba millisinin heyətində də ciddi uğurlara imza atıb. Karkases 2007-ci ildə Panamerika Oyunlarının və NORCECA çempionatının qalibi olub, 2008-ci il Olimpiya Oyunlarında dördüncü yeri tutub. Həmin il FIVB World Grand Prix turnirində gümüş medal qazanıb.
Kenia Karkases yeni mövsümdə "Turan"ın həm Azərbaycan Yüksək Liqasında, həm də Avropa arenasındakı uğurları üçün mübarizə aparacaq.
