Idman.biz
Əslən İrandan olan və idman karyerasını bundan sonra Azərbaycanda davam etdirməyi planlaşdıran güləşçi Əmirreza Məsumi Azərbaycan millisinin heyətinə qoşulmaq qərarını maddi amillərlə əlaqələndirmir.
İdman.Biz xəbər verir ki, bu sözləri 21 yaşlı güləşçi şəxsi "Instagram" hesabındakı paylaşımda qeyd edib.
O, Azərbaycan millisinin heyətini seçməsinin səbəbini bu sözlərlə açıqlayıb:
"Bu gündən etibarən idman karyeramda yeni bir mərhələ başlayır. Artıq Azərbaycan millisinin üzvüyəm və bundan sonra bu ölkənin uğurları üçün çalışacağam. Təəssüf ki, sosial mediada bu keçidin əsas səbəbinin maliyyə məsələləri olduğu iddia edilir. Halbuki bu iddialar reallığa uyğun deyil. Doğrudur, müxtəlif ölkələrdən yüksək məbləğli təkliflər almışdım, lakin Azərbaycanın idmana peşəkar yanaşması, güləşdə əfsanəvi simalarımızın və dostlarımızın burada olması, eləcə də ilk gündən göstərilən səmimi və hörmətli münasibət qərarımda həlledici rol oynadı. İnanıram ki, mövcud şərait və Azərbaycanda idmana göstərilən xüsusi diqqət peşəkar karyeramın davamında daha böyük uğurlar qazanmağıma imkan yaradacaq".
Güləşçi indiyədək əldə etdiyi uğurlarda böyük rolu olan məşqçilərinə minnətdarlığını bildirib:
"21 yaşımadək İran yığmasının üzvü olmuşam və doğulduğum, böyüdüyüm ölkənin bayrağını qürurla çiyinlərimdə daşımışam. Bu müddət ərzində 17 , 20 və 23 yaşadək dünya çempionatlarında, eləcə də Asiya çempionatlarında qızıl medallar qazanmışam. Bu uğurlarda böyük rolu olan bütün məşqçilərə və məni dəstəkləyən hər kəsə səmimi təşəkkürümü bildirirəm".
Əmirreza Məsumi vurğulayıb ki, Azərbaycan güləşinin daha da inkişaf etməsi naminə bütün imkanlarını səfərbər edəcək:
"Azərbaycan Güləş Federasiyasından mənə göstərdikləri böyük etimada görə minnətdarlığımı bildirirəm. Azərbaycan xalqına isə səmimi və isti qarşılanmaya görə ürəkdən təşəkkür edirəm. Bu etimada cavab olaraq bütün gücümlə çalışacaq, beynəlxalq arenalarda ölkəm üçün uğur qazanmaq yolunda bütün diqqətimi və səylərimi səfərbər edəcəyəm".
