On günlük fasilədən sonra bədii gimnastika ulduzları yenidən Bakıya toplaşıblar. Dünya kubokundan sonra Milli Gimnastika Arenası daha bir turnirə – Avropa kubokuna ev sahibliyi edir. Bu yarış əlavə intriqa yaradan maraqlı qaydaları ilə seçilir.

İdman.biz xəbər verir ki, Avropa kubokunun tarixi ötən il Bakıda başlayıb və yenə paytaxtımızda davam etdirilir.

Turnirdə yenidən ölkəmizə təşrif buyuran bir neçə tanınmış gimnast da çıxış edir. Onların arasında Dünya kubokunda çoxnövçülükdə qalib gəlmiş Sofia Raffaeli, eləcə də İtaliya millisinin digər üzvü, burada lentlə hərəkətlərdə bürünc medal qazanmış Tara Draqaş da var.

Həmçinin Dünya kubokunun Bakı mərhələsində ən çox medala sahib çıxan ukraynalı Taisiya Onofriyçuku da qeyd etmək olar. O, halqa ilə hərəkətlərdə birinci, çoxnövçülük, top və lentlə hərəkətlərdə ikinci, gürzlərlə hərəkətlərdə isə üçüncü olub və ümumi sıralamada liderlik edir.

Keçən il Avropa kuboku bir neçə qitəni bir araya gətirmişdi: turnirdə Avstraliya, ABŞ və Cənubi Koreyadan da gimnastlar çıxış etmişdi. Bu dəfə isə Kosta-Rika, Misir, Hindistan və Özbəkistandan idmançılar gəliblər. Ümumilikdə yarışda 25 ölkədən 175 gimnast çıxış edəcək.

Turnir maraqlı qaydalar əsasında keçirilir. Çoxnövçülük üzrə təsnifat mərhələsindən sonra ən yaxşı 16 gimnast mütləq birinciliyin finalında "Cross Battle" adlı mərhələdə qüvvəsini sınayacaq. Qaydalara əsasən, təsnifatda birinci yeri tutan gimnast 1/8 finalda 16-cı yerdəki iştirakçı ilə qarşılaşacaq, ikinci – 15-ci ilə və s. Play-off mərhələsində gimnastlar yalnız qalibin müəyyənləşdiriləcəyi bir növdə çıxış edəcəklər.

Ayrı-ayrı növlərdə finallar nəzərdə tutulmayıb. Bütün hərəkətlər üzrə mükafatçılar çoxnövçülüyün nəticələrinə əsasən müəyyən olunacaq. Qrup hərəkətləri komandaları da "Cross Battle" mərhələsində yarışacaq. Bu baxımdan, Avropa kubokunda mövsümdə ilk sınağı olacaq Azərbaycan komandasını izləmək maraqlı olacaq.

Turnirin 45 min avroluq mükafat fondu da diqqət çəkir. "Cross Battle" qalibi 6.000 avro, ən yaxşı qrup isə 10.000 avro mükafat alacaq.

Azərbaycan yarışda geniş heyətlə təmsil olunur. Fərdi proqramda böyüklər kateqoriyasında Gövhər İbrahimova və Zöhrə Cəfərova, yeniyetmələr arasında isə Şəms Ağahüseynova, Azadə Atakişiyeva və Fidan Qurbanlı çıxış edəcəklər.

Böyüklərdən ibarət qrup komandasında Ləman Əlimuradova, Darya Sorokina, Yelizaveta Luzan, Güllü Ağalarzadə, Kamilla Əliyeva və Sofiya Məmmədova yer alıblar. Yeniyetmələrdən ibarət qrup komandasına isə Nəzrin Abdullayeva, Ayan Nəsirova, Nəzrin Salmanlı, İlahə Bahadırova, Şəms Müvəffəqi və Nilufər Oruclu daxildirlər.

Qeyd edək ki, ötən illə müqayisədə Avropa kubokunun müddəti bir gün artırılıb. Bakıda dörd gün boyunca ulduzların parlayacağı bədii gimnastika bayramı olacaq.

Zəki Feyzullayev
İdman.biz