İdman.biz
"Biz sonadək mübarizə apardıq. Amma "Qarabağ" qələbə qazandı".
İdman.biz xəbər verir ki, bunu "Zirə"nin qapıçısı Tyaqo Silva deyib.
Portuqaliyalı qolkiper Azərbaycan kubokunun finalında "Qarabağ"a 1:2 hesablı məğlubiyyəti şərh edib: "Mövsümü çempionatda 2-ci yerdə başa vurduq və kubokun finalına yüksəldik. Bu nəticələrə görə, komanda ilə fəxr edirəm. Final bir oyundan ibarətdir. Məğlubiyyətin səbəbləri barədə danışmaq tezdir. Bütün mövsümboyu çox çalışdıq. Üzərimizə düşən vəzifənin öhdəsindən gəlib, Avropa kuboklarına vəsiqə qazandıq".
Tyaqo Silva qarşıdakı mövsümlə bağlı planlarından da danışıb. O, "Zirə"nin Avropa Liqasının qrup mərhələsində oynamaq arzusunda olduğunu bildirib: "Qarşıda bizi avrokuboklarda çətin mübarizə gözləyir. Qrup mərhələsinə yüksəlmək istəyirik. Amma bu heç də asan olmayacaq. Öz çıxışıma gəlincə, açıq danışaq, Azərbaycanda mövsümün ən yaxşı qapıçılardan biri oldum. Çempionat və kubokda buraxılan qolların sayı da bunu deyir. Bu, məni arxayınlaşdırmır. Daha çox işləyəcəm. Gələcəkdə nə olacağını zaman göstərək. Öz çıxışımdan tam razı qaldım. "Zirə" ilə müqaviləm və burada çox xoşbəxtəm. Əlbəttə, karyeramda daha böyük uğurlara nail olmaq istəyirəm. Qarşıda vaxtım var".
Qeyd edək ki, Tyaqo Silva 2023-cü ilin yayından "Zirə"də çıxış edir.
Banuçiçək Hüseynli
İdman.biz
