YETƏR! - TƏHLİL

Qadın futbolçulardan ibarət Azərbaycan millisi AVRO-2025-in seçmə mərhələsində ilk qələbəsini qazanıb.

İdman.biz xəbər verir ki, yığmamız Bakıda Türkiyəni 1:0 hesabı ilə məğlub edib.

Bu qələbə Siyasət Əsgərovun yetirmələrinə hava-su qədər lazım olan 3 xalı gətirib. Komandamız qalibiyyət sayəsində 1-ci yeri tutmaq və A liqasına yüksəlməyə nəzəri şanslarını saxlayıb. Amma bu, çox çətin olacaq. Çünki Bakıda 0:4 hesabı ilə uduzduğumuz İsveçrə ilə səfər görüşünə ümid etmək yersiz görünür. Əslində, bunun özü də yetərli deyil və digər nəticələr önəmlidir.

Ən əsası isə Türkiyə üzərində qələbə C liqasına yuvarlamaq təhlükəsinə ciddi təsir edib. Artıq yığmamızın taleyi başqalarının deyil, öz əlindədir.

Növbəti turda qələbə Azərbaycan millisini B liqasında yerini təmin etməsi ilə nəticələnə bilər. Söhbət Macarıstanla iyulun 12-dəki matçdan gedir.

Yığmamız səfərdə 1:1 heç-heçə etdiyi rəqibi Bakıda udsa, sonuncu olmayacağı rəsmiləşəcək. Çünki ən pis halda Azərbaycanla Macarıstanın eyni xalı olacaq ki, komandamız şəxsi oyunlarda rəqibini qabaqlayacaq. Hətta üç yığma – Türkiyə, Azərbaycan və Macarıstanın xalları bərabər olsa da, millimiz sonuncu yeri tutmayacaq. Buna görə də Bakıdakı qələbə B liqasında qalmağa yetər.

Düzdür, B liqasının qrup üçüncülərindən də biri aşağı diviziona düşəcək. Amma Macarıstan üzərində qələbə ilə xallarını 7-yə çatdırmaqla ən zəif 3-cü yer sahibi olmaqdan da qurtulacaq.

Digər tərəfdən millimiz Macarıstanı udarsa, AVRO-2025-in pley-offunun 1-ci mərhələsinə vəsiqə qazanacaq. Bu raunda hətta ən yaxşı nəticəyə malik qrup sonuncusu da çıxacaq. V turdakı qalibiyyət pley-offun 12 iştirakçısı sırasına vəsiqəni təmin edəcək.

Əsgərovun komandası Macarıstanla heç-heçə etsə, yığmanın taleyi son turda həll olunacaq. Bakıdakı məğlubiyyət isə Türkiyə - İsveçrə matçının nəticəsini və zərurət yaransa son turu həllediciyə çevirəcək.

Vüqar Xeyrullayev
İdman.biz