Xəyal Nəcəfov: “Çox çətin sual oldu, nə cavab verəcəyimi bilmirəm”

2 ildi icarə əsasında "Turan Tovuz"un formasını geyinsə də, müqavilə ilə "Neftçi"yə məxsusdu. Artıq icarə müddəti başa çatıb. Gələcəyini hansı klubda görür? Bu və bizi maraqlandıran başqa sullara cavab tapmaq üçün Xəyal Nəcəfovla danışmağa qərar verdik. Sport24.az-a müsahibə verən yarımmüdafiəçi həm geridə qalan mövsümü dəyərləndirib, həm də gələcəyi ilə bağlı danışıb.

- Öncə geridə qoyduğumuz mövsümü dəyərləndirərdin...
- Mövsümə yaxşı başladıq. Elə oldu ki, 11 oyun uduzmadıq. Amma bir ara biz də əksər komandalar kimi "qara zolağ"a düşdük. Ümumi götürəndə xarakter göstərdik, döyüşdük, hətta məğlub olduğumuz matçlarda belə dominant futbol sərgilədik. Sonuncu görüşümüzü də 3 xalla tamamladıq. Hesab edirəm ki, pis çıxış etmədik.

- Öz performansından razı qaldın?  
- Həmişə üzərimdə çalışıb daha yaxşı çıxış etməyə çalışıram. Məncə, 5 ballıq şkala üzrə götürsək, kafi qiymətləndirmək olar. Növbəti mövsümdə daha yaxşı olmağa çalışacam.

- Bu il sənin üçün ən yadda qalan oyun hansı oldu?
- "Araz-Naxçıvan"la oyunumuzu qeyd edərdim. Həmin qarşılaşmada həm qol vurdum, həm də məhsuldar ötürmə etdim.

- "Turan Tovuz"da icarədə idin. Müqavilə ilə "Neftçi"yə məxsussan və mövsümlərarası fasilədə "ağ-qaralar"ın düşərgəsinə dönməlisən. Gələcəyini hansı komandada görürsən?
- Bəli, "Turan Tovuz"la icarə müddətim yayda bitir. "Neftçi" ilə isə 2025-ci ilə kimi sözləşməm var. Odur ki, "ağ-qaralar"ın düşərgəsinə qoşulub toplanışa yollanacam. Ondan sonra klub rəhbərliyi barəmdə hansı qərarı versə razılaşacam.

- Seçim səndən asılı olsaydı "Neftçi"ni, yoxsa "Turan Tovuz"u seçərdin?
- Çox çətin sual oldu (gülür), nə cavab verəcəyimi bilmirəm. Müqavilə ilə "Neftçi"yə məxsusam. Onu da xüsusi vurğulayım ki, bir il "ağ-qaralar"ın heyətində oynayıb komandaya maksimum faydalı olmağa çalışdım. Yenidən şans versələr paytaxt klubu üçün əlimdən gələni edəcəm.

- "Neftçi" bu il uğursuz çıxış edərək mövsümü 5-ci pillədə tamamladı. "Ağ-qaralar"ın belə zəif çıxşına münasibətini bilmək istərdik...
- Əslində bu barədə nəsə danışmağım düz çıxmaz. Amma "Neftçi"nin avrokuboklara vəsiqə qazana bilməməsi yaxşı olmadı. "Neftçi" Azərbaycan futbolunda markadı. Bu komandanın tarixi və ənənəsi var. Ona görə "Neftçi" həmişə zirvədə olmalıdı.  

- Miodraq Bojoviç "Neftçi"dən yola salındı. Səncə, bundan sonra komandaya yerli, yoxsa əcnəbi mütəxəssis dəvət olunmalıdı?
- Kimliyindən asılı olmayaraq əsas odur ki, "Neftçi"ni irəli aparan mütəxəssis olsun.

ABDULLA İSMAYILOĞLU