Sport24.az
"Komandama çox inanırdım. Çempion ola bilmədik. Amma şükürlər olsun ki, ikinci cəhddə qarşıya qoyulan məqsədə, daha dəqiq desəm, II Liqaya yüksəldik". Bu sözləri Sport24.az-a açıqlamasında "Hypers"in baş məşqçisi Vüqar Nadirov deyib.
Gənc mütəxəssis "Şimal"a məğlubiyyətin acısını unutmaq üçün atdıqları addımdan da danışıb: "Kollektiv olaraq həmişə bir yumruq kimi birləşmişik. Region Liqasının finalında "Şimal"a məğlub olduqdan sonra üzərimizdə təzyiq vardı. Futbolçularım 4-5 gün özlərinə gələ bilmədi. Onları stresdən çıxarmaq üçün çox çalışdıq. Hətta klub olaraq bütün oyunçuları komedixanaya da apardıq ki, əhvalları düzəlsin. Şükürlər olsun ki, toparlandıq və "Şəfa"nı məğlub edə bildik".
Nadirov artıq yeni mövsümün konturlarını cızdıqlarını da bildirib: "Hazırda futbolçuları istirahətə buxarmışıq. PFL-in qərarını gözləyirik. Amma II liqayla bağlı planları cızmağa başlamışıq. Danışıq apardığımız oyunçular var. Əsasən I və II liqada oynayan oyunçuların xidmətində maraqlıyıq. Təbii ki, hazırkı heyətdən də saxlayacağımız futbolçular olacaq. İstər futbolçu, istərsə də məşqçilik karyeramda həmişə ən yaxşı olmağa can atmışam. Odur ki, II liqada da qarşımıza maksimum hədəf qoyacağıq".
ABDULLA İSMAYILOĞLU
