"Meydana qələbə üçün çıxmışdıq. Rəqibdən güclü olsaq da, sonda "Şimal"ın bəxti gətirdi. Futbolda bəxt amili də vacibdi. Bizim günümüz deyildi. Təəssüf ki, həlledici matçda qalib ola bilmədik". Bu sözləri Sport24.az-a açıqlamasında Region Liqasında ikinci olan "Hypers"in baş məşqçisi Vüqar Nadirov deyib.
Gənc mütəxəssis final qarşılaşmasını şərh edib: "Rəqibin uğuruna kölgə salmaq istəmirəm. Onları təbrik edirəm. Amma final matçında 120 dəqiqə meydanda dominant tərəf biz idik. Çoxsaylı qol imkanlarımız olsa da, yalnız birindən istifadə etdik. Əvəzində "Şimal" bir təsadüfi qolla hesabı bərabərləşdirdi. Penaltilərdə isə artıq güclü-zəif olmur. Bu lotoreyadı. Kimin bəxti gətirdi, o da qalibdi. Ümumi götürəndə yaxşı çıxış etdik. Futbolçularımı təbrik edirəm".
Nadirov "Şəfa" ilə qarşıdakı pley-off görüşündən və gələcək planlardan da danışıb: "Bu mövsüm qarşımıza II Liqaya çıxmağı hədəf qoymuşduq. Çempion ola bilmədik, amma bizim üçün mübarizə hələ bitməyib. İrəlidə bizi "Şəfa" ilə 2 gərgin oyun gözləyir. Onları məğlub etmək üçün əlimizdən gələni edəcəyik. Futbolçularımın mənə "borcu" var. "Şəfa" səddini keçməklə "borclarını" qaytarmalıdılar. II Liqaya yüksələ bilməsək, gələn mövsüm yenə Region Liqasında çıxış edəcəyik. Təslim olmaq niyyətimiz yoxdu. 6-7 aya yaranan komanda olsaq da, böyük təcrübə qazandıq. Klub prezidenti Ayaz Abdullayev hər məsələdə arxamızdadı və əlindən gələni edir. "Şimal"a məğlun olanda özü yaxınlaşıb dedi ki, hansı liqada çıxış etməyindən asılı olmayaraq "Hypers"ə hər cür dəstək göstərəcək. Komanda olaraq çalışacağıq Ayaz müəllimin ümidlərini doğruldaq".
ABDULLA İSMAYILOĞLU