Baş məşqçi axtarışına çıxan "Turan Tovuz" rəhbərliyi bəzi yerli mütəxəssislərlə danışıq apardıqdan sonra, indi də ölkə xaricinə üz tutub. Sport24.az-ın əldə etdiyi məlumata görə, növbəti mövsümün sonunda komandasını avrokuboklara vəsiqə qazanmasını istəyən Ehtiram Quliyev xaricdən məşqçi gətirməyi düşünür.
Tovuz təmsilçisi artıq əcnəbi ilə əlaqə saxlayıb. Söhbət ukraynalı, azərbaycanlı azarkeşlərə tanış olan Roman Qriqarçukdan gedir. Ukraynalı məşqçi tovuzluların təklifinə "yox" deməyib. Ancaq müəyyən şərtlər irəli sürüb. 59 yaşlı mütəxəssis tovuzlulardan illik 450 min avro maaş tələb edib və müqaviləsinin müddətinin minimum 2 illik olmasını istəyib. Bundan başqa avrokuboklara vəsiqə qazanmaq, yəni, qarşıya qoyulan məqsədə çatmaq üçün komandanın (klubun yox) büdcəsinin ən azı 4 milyon avro olmasını rəhbərliyin diqqətinə çatdırıb.
Yeri gəlmişkən onu da bildirək ki, Ukraynada müharibə getdiyindən 60 yaşa kimi kişilərin ölkədən çıxışına qadağa qoyulub. Belə çıxır ki, 59 yaşlı Qriqarçukun Azərbaycana gəlməsi naminə klub rəhbərliyi müvafiq qurumlardan icazə almalıdı.