Tural Cəlilov: "Ümid az, istək isə çox idi"

"Bizim üçün gərgin oyun olacağını göz önünə almışdıq. Bu gün meydanda yalnız final oyunu yox, həm də azarkeşlərimiz üçün bayram oldu". Bu sözləri Sport24.az-a açıqlamasında Region Liqasında çempion olan "Şimal"ın oynayan məşqçisi Tural Cəlilov deyib.

Xaçmaz komandasının çalışdırıcısı finaldakı rəqibi "Hypers"in daha güclü olduğunu etiraf etməkdən də çəkinməyib: "Mövsümün əvvəlindən bilirdik ki, "Hypers" heyətinə görə, digər komandaları üstələyir. Vüqar Nadirov keyfiyyətli futbolçulardan ibarət komanda formalaşdırıb. Onlarla qrup oyunlarımız da gərgin keçmişdi. Favorit rəqib idi, amma biz də təslim olmadıq. Şanslarımız çox deyildi. Ümid az olsa da, istəyimiz çox idi. İlk yarıda rəqib bizi təzyiq altında saxladı və qol vurdu. Fasilədən sonra toparlanıb meydanda söz sahib olmaqla hesabə bərabərləşdirdik. Heyif ki, digər fürsətlərimizi qola çevirə bilmədik. Oyunun əlavə vaxta və penaltilər seriyasına qədər uzanacağını da nəzərə almışdıq. Qapıçımıza güvənim çox idi və o, bizim xilaskarımıza çevrildi. Layiqli çempionluq qazandıq. Debüt ilimizdə böyük uğur qazanmaq çox xoş oldu. Bundan sonra da inkişaf etmək, peşəkarlaşmaq yönündə addımlar adacağıq".

Qeyd edək ki, Region Liqasının finalı dünən Şamaxıda baş tutub. Həlledici qarşılaşmada "Hypers" və "Şimal" üz-üzə gəlib. Matçın əsas vaxtı heç-heçə (1:1) başa çatdığından və əlavə vaxtda qapılara qol vurulmadığından oyunun taleyinə penaltilər seriyasında aydınlıq gəlib. "Lotoreya"da daha dəqiq olan xaçmazlılar 2023/24 mövsümünün qalibi olub.

Abdulla İsmayıloğlu