Sport24.az
Başa çatan mövsümdə "Səbail"in qapısını qoruyan Səlahət Ağayev Sport24.az-a müsahibə verib. Təcrübəli "çərçivə qoruyucusu" həm komandasının çıxışını qiymətləndirib, həm də bizi maraqlandıran başqa sualları cavablandırıb.
- Öncə geridə qalan mövsümlə bağlı fikirlərini bölüşərdin...
- Həm maraqlı, həm də gərgin məcrada keçən "futbol ili"nin sonuna gədlik. Komandalar hər həftə meydana sonuncu oyuna çıxırlarmış kimi ayaq basırdılar. Məhz buna görə də Premyer Liqada sonuncu tura kimi intriqa ölmədi. Fikrimcə, gələn mövsüm daha rəqabətli çempionat izləyəcəyik.
- "Səbail"in çıxışını necə dəyərləndirirsən?
- Mövsüm bizim üçün də enişli-yoxuşlu keçdi. Qarşımıza avrokuboklara getmək tapşırığı qoyulmasa da, qitəmiqyaslı yarışlara yollanmağa çox yaxın idik. Hətta elə oldu ki, bir ara ilk "4-lük"də də qərarlaşdıq. Sadəcə, heyətimizdə Ağabala Ramazanov başda olmaqla bir çox futbolçularımızın sıradan çıxması, vacib oyunlarda xallar itirməyimiz bizi avrokuboklardan uzaq qoydu.
- Bəs öz öz oyunundan razı qaldın?
- Əvvəlki mövsümlə müqayisədə bu il daha çox oynamaq şansı qazandım. Düşünürəm ki, optinal formamı qorumuşam. Amma yenə də ən yaxşı qiymətləndirməni məşqçilər korpusu edə bilər. Fürsətdən istifadə edib qapıçılar üzrə məşqçimiz Fuad Əsədova dərin minnətdarlığımı bildirirəm.
- "Qarabağ"ın Çempionlar Liqasına yollanacağı bəlli idi. Son turda "Zirə", "Sabah", "Sumqayıt" avrokuboklara vəsiqəni təmin etdilər. Səncə, hər üç komanda qitəmiqyaslı turnirlərə yollanmağa layiqdilər, yoxsa burda bəxt amili də sözünü dedi...
- Çoxları bəxtsizlikdən şikayətlənir. Bəzən də uğur qazanmayanda rəqiblərin bəxtinin gətirdiyini vurğulayırlar. Heç kimin uğuruna kölgə salmaq istəmirəm. Bəxt də güclülərin tərəfində olur. Hər üç təmsilçimizə qitəmiqyaslı yarışlarda uğurlar arzu edirəm.
- "Səbail"də qalacaqsan yoxsa başqa təkliflərin var?
- "Dənizçilər"lə müqaviləm bitir. Gələcəyimi harda davam etdirəcəyimi bilmirəm. Hələki istirahətdəyəm.
- Sabiq komandan "Neftçi" bərbad çıxışıyla diqqət çəkdi. Bu barədə nə deyərdin?
- "Neftçi" futbolumuzun flaqmanıdı. Biz "ağ-qaralar"ın daim yaxşı çıxış edib, yüksək yerlərdə qərarlaşdığını görmüşük. Ümid edirəm onlar qısa zamanda toparlanıb gələn mövsüm daha yaxşı çıxış edəcəklər.
- Əslən Füzulidənsən. Artıq doğma yurdunun təmsilçisi II liqada çıxış edir. Nə vaxtsa "Füzuli"nin heyətində oynamağı düşünürsən?
- Füzulidə doğulmuşam. Əziz, doğma yurdum futbol ənənəsi olan bölgədi. Sadəcə, müəyyən səbəblərə görə xeyli vaxt idi, təmsilçimiz yox idi. Yenidən Füzulinin peşəkar liqada komandasının olmasına çox sevinirəm. Arzu edirəm ki, hazırda II Liqada mübarizə aparan "Füzuli" gələcəkdə daha güclü liqalarda oynasın. Əlbəttə ki, bir füzulili kimi mən də doğma yurdumun təmsilçisi üçün əlimdən gələni etməyə hazıram.
ABDULLA İSMAYILOĞLU
