Idman.biz
Braziliyanın "San-Paulu" futbol komandasının Cənubi Amerika Kuboku çərçivəsində Boliviyada istifadə etməli olduğu avtobusda 86,5 kq marixuana aşkarlanıb.
İdman.Biz xəbər verir ki, hadisə Koçabamba bölgəsində baş verib. Polis bölməsinin əməkdaşları avtobusa baxış zamanı dörd çantada gizlədilmiş narkotik maddə aşkar ediblər.
Əməliyyat nəticəsində nəqliyyat vasitəsinə cavabdeh olan üç sürücü saxlanılıb. Avtobus "San-Paulu"nun Boliviyadakı səfəri üçün nəqliyyat xidmətini həyata keçirən "Buses Cosmos" şirkətinə məxsus olub.
Hadisənin klubla birbaşa əlaqəsi olmayıb. "San-Paulu" nümayəndələri komandanın saxlanılan avtobusdan istifadə etmədiyini bildiriblər. Şirkət əvvəlcədən razılaşdırılmış vaxtda başqa avtobus təqdim edib və komandanın logistikasında problem yaranmayıb.
"San-Paulu" Boliviyaya Cənubi Amerika Kubokunun 1/8 finalında "Bolivar"la qarşılaşmaq üçün yollanıb. Qarşılaşma 1:1 hesabı ilə başa çatıb.
