“Şamaxı”nın qəhrəmanı: “İnanın, bu gün 3 qol vurmağıma yox, qələbə qazanmağıma sevinirəm”

"Qaradağ Lökbatan" - "Şamaxı" matçının qəhrəmanı heç şübhəsiz ki, qonaqların futbolçusu Emin Zamanov oldu. "Şirlər"in yarımmüdafiəçisi het-trik edərək komandasına qələbə qazandırmaqla yanaşı, demək olar ki, Premyer Liqaya yolunu açdı. Komandasının qələbəsində önəmli rol oynayan Emin Sport24.az-ın əməkdaşının suallarını cavablandırıb.

- Emin, ağır 90 dəqiqədən sonra qələbə qazandız. Oyunla bağlı fikirlərin maraqlıdı...
- Mövsüm ərzində ən vacib oyunumuza çıxmışdıq. "Qaradağ Lökbatan"la matçın böyük ölçüdə çempionluğun taleyini həll edəcəyini və çətin olacağını bilirdik. Amma şükürlər olsun ki, sonadək mübarizə apardıq və 3 xalımızı qazandıq. Qələbəmizi Vətən Müharibəsi zamanı Qarabağımız uğrunda canlarını fəda edən şəhidlərimizə, qazilərimizə və onların ailələrinə həsr edirik.

- Hesabı açan və fasiləyə üstün yollanan meydan sahibləri oldu. Oyuna istədiyiniz kimi başlaya bilməməyinizin səbəbi nə idi?
- Çox güclü və xoş sözlərə layiq rəqibə qarşı oynayırdıq. "Qaradağ Lökbatan" uzun müddət turnir cədbəlinə təsadüfən liderlik etmirdi. İlk dəqiqələrdən meydan sahibləri yaxşl pressinq tətbiq etdilər və ehtiyatlı oynadılar. Fasiləyə qədər toparlanıb, bərabərlik qolunu vursaq da, rəqib bizdən daha istəkliydi və 2-ci qolu vurmaqla ilk yarını öz xeyirlərinə başa vurdular. Yalnız fasilədən sonra özümüzə gəlib ardıcıl qollar vurmaqla bizə lazım olan nəticəni qoruduq.

- Bura kimi bəzi oyunlarda vacib xallar itirmişdiz…
- Təbii ki, bəzi oyunlarda vacib xallar itirdik. Amma artıq bunun əhəmiyyəti yoxdu. Ən azı həmin oyunlardan dərs çıxardıq və bu gün bizə lazım olan zəfəri qazandıq. İrəli baxmalıyıq.

- Komandanızın əsas "qol silahı" Elşad Tağıyev olsa da, bu gün het-rik etdərək "Şamaxı"ya qələbəni sən qazandırdın...
- İnanın, bu gün 3 qol vurmağıma yox, qələbə qazanmağıma sevinirəm. Əsas mənim neçə qol vurmağım yox, "Şamaxı"nın uğurudu.

- Növbəti və sonuncu oyununuzu autsayder "Araz Saatlı"ya qarşı keçirəcəksiz. Bu günkü qələbə komandanı arxayın salmaz ki?  
- Hələ çempionat bitməyib. Nə qədər sevincimiz böyük olsa da, bizi qarşıda daha bir çətin sınaq gözləyir. Saatlı təmsilçisi ilə oyun "Qaradağ Lökbatan"dan daha gərgin olacaq. Odur ki, arxayınlğa yol verə bilmərik. Əlimizdən gələnin ən yaxşısını edəcəyik ki, mövsümə qələbəylə yekun vurub çempionluğumuzu rəsmləşdirək.

- "Şamaxı"da qalacaqsan?
- Bu dəqiqə ancaq "Şamaxı"nın çempion olması barədə düşünürəm. "Qızıl"I təmin edəndən sonra gələcək karyermla bağlı danışa bilərəm.

ABDULLA İSMAYILOĞLU