Şahin Diniyev: “Ənənə, stabillik olmalıdır”

"Deyiləcək bir söz yoxdur. Oyuna hazırlaşmışdıq, amma istədiyimiz kimi alınmadı".

İdman.biz xəbər verir ki, bunu "Səbail"in baş məşqçisi Şahin Diniyev deyib.

Təcrübəli mütəxəssis Azərbaycan Premyer Liqasının XXXIII turunda "Qəbələ"yə 2:3 hesablı məğlubiyyəti şərh edib: "Bəlkə də, mövsümün ən zəif oyununu oynadıq. "Qəbələ" daha istəkli idi. Əslində, əskinə olmalıydı, şanslarımız qalmalıydı. Bu gün artıq avrokubok şansı yoxdur. Futbolda hər şey olur, qəbul etmək lazımdır. Yolumuza davam edəcəyik. "Qəbələ"ni təbrik edirəm. İstədiyimizi ala bilmədik".

Şahin Diniyev mövsümün sonunda yaxın komandanın çıxışındakı enişə aydınləq gətirib: "Yeni komandayıq, futbolçular ilk dəfə idi bir yerə yığışmışdı. Ənənə, stabillik olmalıdır. Bəzi yerlərdə güclənməyə ehtiyacımız var. Gələcəyə baxış üçün yaxşı komandamız var. Komanda 90 faiz dəyişdi, zədəlilərimiz oldu. Səhvi özümüzdə axtarmalıyıq. Altıncı yerdəyik, liqadan düşmürük. Gördüyümüz odur ki, komandanın yeni olması bu problemləri artırdı".

"Səbail"in baş məşqçisi komandada stabilliyin olmamasından şikayətlənib: "Stabilliyin olmaması bu yerə gətirib çıxardı. İndiki nəticəni uğurlu hesab edirik. Altılıqda qalsaq, məqsədimizə çatarıq. Avrokubok şansımız var idi. Üzgünük. Ancaq məqsəd altıncı yerdə bitirməkdir. Gələn il isə rahat avrokubok zonasına oynamaqdır. Biz lazımı oyunlarda özümüzü kökləyə bilmədik".

Qeyd edək ki, "Səbail" 42 xalla 6-cı pillədə qərarlaşıb.

İdman.biz