"Sabah" UEFA-dan minimum 8,98 milyon avro qazanacaq

Azərbaycanın "Sabah" futbol komandası Çempionlar Liqasının pley-off mərhələsinə yüksəlməklə UEFA-dan minimum 8,98 milyon avro (təxminən 17,9 milyon AZN) gəliri təmin edib.

İdman.Biz xəbər verir ki, bu məbləğ "Sabah"ın pley-offda İsrailin "Hapoel Beer-Şeva" komandasına uduzacağı və daha sonra Avropa Liqasının əsas mərhələsində səkkiz oyunun hamısında məğlub olacağı ən pis ssenari üzrə hesablanıb.

Çempionlar Liqasının pley-offunda mübarizəni dayandıran klublara 4,29 milyon avro (təxminən 8,51 milyon AZN) ödənilir.

Belə komandalar avtomatik olaraq Avropa Liqasının əsas mərhələsinə düşürlər. Burada iştiraka görə əlavə 4,31 milyon avro (təxminən 8,55 milyon AZN) nəzərdə tutulur. Hətta "Sabah" səkkiz matçın hamısında uduzaraq 36-cı yeri tutsa belə, turnir cədvəlindəki mövqeyinə görə daha 75 min avro (təxminən 149 min AZN) əldə edəcək.

Bundan başqa, klub əmsalı, televiziya bazarı və digər kommersiya göstəriciləri ilə bağlı ödənişlər də nəzərə alınır. Hesablamalara görə, "Sabah" bu istiqamətdə minimum 307 min avro (təxminən 609 min AZN) qazana bilər.

Beləliklə, Azərbaycan çempionunun Çempionlar Liqasının pley-offuna yüksəlməklə təmin etdiyi minimum gəlir 8,98 milyon avroya çatır.

"Sabah" "Hapoel Beer-Şeva" səddini keçərək Çempionlar Liqasının əsas mərhələsinə vəsiqə qazansa, rəqəmlər daha da artacaq. Bu halda klubun minimum gəliri 20,17 milyon avro (təxminən 40 milyon AZN) təşkil edəcək.

Əsas mərhələyə vəsiqənin özü "Sabah"a 18,62 milyon avro (təxminən 36,95 milyon AZN) qazandıracaq. Komanda səkkiz oyunun hamısında məğlub olaraq sonuncu - 36-cı pilləni tutsa belə, əlavə 275 min avro (təxminən 546 min AZN) əldə edəcək.

Klub əmsalı və yayım bazarı ilə bağlı ödənişlər isə bu ssenaridə minimum 1,28 milyon avro (təxminən 2,54 milyon AZN) həcmində qiymətləndirilir.

Beləliklə, "Sabah" Çempionlar Liqasının əsas mərhələsinə yüksələcəyi halda heç bir xal qazanmadan belə UEFA-dan minimum 20,17 milyon avro gəlir əldə edə bilər.

Qeyd edək ki, Çempionlar Liqasının 2026/27 mövsümünün pley-off oyunları 18-19 və 25-26 avqust tarixlərində keçiriləcək.