Idman.biz
"Sabah" futbol komandasının müdafiəçisi Timoteuş Puxaç Polşa millisinin soyunma otağındakı liderlər barədə danışıb.
İdman.Biz xəbər verir ki, polşalı futbolçu bu sözləri yığmanın toplanışı zamanı "Foot Truck" kanalında Lukaş Visnyovski və Mateuş Boreklə söhbətində deyib. Puxaçın fikrincə, Robert Levandovski ən vacib anlarda meydanda məsuliyyəti öz üzərinə götürən futbolçulardandır, lakin komanda yoldaşlarını sözlə ruhlandırmaq onun güclü tərəfi deyil.
Müdafiəçi bu baxımdan Kamil Qliki nümunə göstərib. Onun sözlərinə görə, Qlikin çıxışları komandaya xüsusi təsir edirdi.
"Qlik danışanda biz on santimetr hündür olurduq", - deyə Puxaç bildirib.
Futbolçu Kamil Qrosiskinin çıxışlarına da toxunub. O, həmin nitqlərin ona tam təbii görünmədiyini və bunu hiss etmədiyini deyib. Puxaç Qrosiskini aşağılamaq istəmədiyini vurğulayıb, Qlikin isə xüsusi auraya malik olduğunu qeyd edib. Onun fikrincə, 2016-cı il Avropa çempionatında Qrosiskinin çıxışları yerinə düşə bilərdi, sonralar isə vəziyyət dəyişib.
Polşa millisi başa çatan fasilədə UEFA Millətlər Liqasının B divizionunda bir qələbə qazanıb, bir dəfə heç-heçə edib və iki dəfə uduzub.
