Sport24.az
Misli Premyer liqasının ilk turunun ikinci oyun gününə Masazırda yekun vurulacaq. Sport24.az xəbər verir ki. Son ölkə çempionu "Sabah" "doğma divarlar" arasında "Kəpəz"i qəbul edir.
Əslində bu qarşılaşma Gəncədə keçirilməli idi. Sadəcə, "bayquşlar"ın gələn həftə Çempionlar Liqasının Pley-offunda oynaması səbəbindən matçın məkanı hər iki klubun razılığı ilə dəyişdirildi.
Heç şübhəsiz ki, oyunun favoriti "Sabah"dı. Valdas Dambrauskasın komandası nəyə qadir olduğunu ÇL təsnifat mərhələsində keçirdiyi görüşlərdə ortaya qoyub. 6 qarşılaşmada 5 qələbə qazanan "bayquşlar" 3 fərqli ölkənin çempionunu mübarizədən kənarlaşdırıb. Bu üzdən Masazır təmsilçisinin 35-ci ölkə çempionatına da qələbə ilə başlayacağına şübhə edənlərin sayı çox azdı. "Kəpəz"in isə indiki durumunu nəzərə alsaq, gəncəlilərin bu gün sürpriz edəcəyini heç kim gözləmir.
Qeyd edək ki, turun digər oyunları sabah və bazar ertəsi baş tutacaq.
Misli Premyer liqası
I dövrə, I tur
20:45. "Sabah" - "Kəpəz"
Hakimlər: Fərid Hacıyev, Rəhman İmami, Müslüm Əliyev, Əli Əliyev
VAR: Rauf Cabarov
AVAR: Elşad Abdullayev
Hakim-inspektor: Asim Xudiyev
AFFA nümayəndəsi: Zümrüd Ağayeva
Masazır. "Bank Respublika Arena".
