"Neftçi"nin sabiq kommersiya direktoru Rüstəm Allahverdiyev klubdan ayrılandan sonra "İqsports" adlı idman agentliyi yaradıb. Agentliyin fəaliyyəti qısa vaxtı əhatə etsə də, gördüyü işlərlə diqqət mərkəzinə düşməyi bacarıb. Artıq bəzi idmançılar "İqsports"un xidmətindən yararlanır və böyük ehtimalla, gələcəkdə onların sayının artacaq. Allahverdiyev özü də uğur qazanacaqlarına inanır. O, Sport24.az-a müsahibəsində futbolla yanaşı, digər idman növlərinə də diqqət ayırdıqlarını və gələcəkdə daha böyül layihələrə imza atmaq istədiklərini bildirib.
- Yaranan gündən bəri "İQsports" olaraq hansı irəliləyişə nail olmusunuz?
- Artıq bir aydı fəaliyyətdəyik. Bu müddət ərzində bəzi irəliləyişlərimiz var. Dörd elita təmsilçisiylə danışıqlarımız davam edir. Onlarla media, marketinq və digər bu kimi sahələrdə razılığa gəlmək üzrəyik. Yaxın günlərdə sözləşmə imzalayacağıq. Bundan başqa Gənclər və İdman naziri, digər idman növlərinin federasiyaları və başqa klublarımızla da görüşlərimiz, söhbətlərimiz olur. Zamanla daha da inkişaf etmək istəyirik.
- Bir müddət əvvəl Rza Cəfərovun gözəl bir videosunu paylaşdız. Perspektivli qolkiperin davamçıları gəlir? O mənada ki, yaxın perspektivdə daha kimlərlə əməkdaşlığa rəsmi start verəcəksiniz?
- Gənc "əlcək sahibi"ylə işlərə başlamışıq. Onun sosial şəbəkələrdəki səhifələrinin idarə olunması, media ilə əlaqlələrin qurulması və digər bu kimi məsələlərlə razılığa gəlmişik. Daha 2 futbolçu və qeyri-futbol sahəsindən olan idmançılardan da bizə müraciət daxil olub. Onlarla da əməkdaşlıq edəcəyik.
- Uzun illər futbolda çalışmısınız. Ancaq futboldan fərqli, digər idman növlərində ölkəmizin daha böyük uğurları var. Fərdi idman növlərinə baş vurmaq fikriniz var?
- İdman agentliyi olaraq qeyri-futbol sahələrinə daha çox köklənəcəyik. Sadəcə, uzun illər futbol ictimaiyyətinin içində olduğumuz üçün idmanın "şah"ı ilə start götürdük. Qarşıdan Olimpiya oyunları gəlir. Odur ki, bu sahədə çıxış edəcək idmançılarımızla daha aktiv çalışmağı hədəfləyirik.
- Bildiyimiz qədəri ilə analoji sahədə Türkiyədə fəaliyyət göstərən həmkarlarınızla da işbirliyinə start verməyi planlaşdırırsınız...
- Hələ "Neftçi"də mətbuat katibi olduğum dövrlərdən xarici şirkətlərlə əlaqələrim vardı. Nə vaxtsa özümündə idman agentliyini yararadacağım təqdirdə Azərbaycan hüdudlarından da kənara çıxmağı nəzərə almışdım. Rusiya, Gürcüstan və Türkiyədə idman şirkətləri çoxdu. Bizdə isə bu sahə təzə-təzə yaranır. Odur ki, biz də qonşu ölkələrdəki bəzi şirkətlərin təcrübəsindən istifadə edirik. Yaxın gələcəkdə bir çox özünü yaxşı tərəfdən göstərən idman agentlikləriylə də partnyorluq əməkdaşlığını rəsmləşdirəcəyik.
- Və sonda. Üfüqdə nələr görünür?
- Səmimi deyim ki, bu işə əl qoyanda bir qədər alınıb-alınmamasıyla bağlı qorxum vardı. Amma fəaliyyətə start verəndə gördük ki, bu sahəyə bazarda ciddi ehtiyac var. Hələlik yaxşı irəliləyirik. İşimizi Azərbaycanda otuzdura bilsək, böyük layihələrə imza atacağıq. Odur ki, üfüqdə aydınlıq və uğur görünür.