Ramiz Məmmədov: "Biz heç vaxt nə qorxaq futbol oynamışıq, nə də vaxt uzatmışıq”

Dünən futbol camiəsinin diqqəti I Liqanın XXVI turu çərçivəsində baş tutan "Qardağ Lökbatan" – "Şamaxı" matıçına yönəlmişdi. Qəəbə təmsilçisi qalib gələcəyi təqdirdə çempionluğu rəsmiləşdirəcəkdisə, qonaqlar meydandan 3 xalla ayrılacağı halda "qızıl"a doğru ciddi addım atmış olacaqdı. Qarşılaşma gözləndiyindən də maraqlı alınıb və görüş qonaqların 3:2 hesablı qələbəsi ilə yekunlaşıb. Bölgə təmsilçisi sonuncu turda autsayder "Araz Saatlı" ilə qarşılaşacaq. Möcüzə baş verməsə, Ramiz Məmmədovun çalışdırdı komanda autsayderi məğlub edib elitaya vəsiqəni rəsmiləşdirəcək. Ancaq Sport24.az-a müsahibə verən Məmmədov elita barədə Saatlı təmsilçisi ilə oyundan sonra danışa biləcəklərini vurğulayıb.

- Öncə son oyunla bağlı fikirlərinizi bölüşərdiz...
- Heç bir rəqibə yuxarıdan aşağı baxmırıq. Bizim üçün hər oyun, hər qələbə böyük zəhmət və fədakarlıqla başa gəlib. Son oyunda lider komandaya qalib gəldik. Həmkarım Azər Həşimov çox mübariz, döyüşkən kollektiv formalaşdırıb. Qalib gəldiyimizə sevinirəm. Rəqibi də gözəl oyuna görə təbrik edirəm. Məncə, stadiona gələn azarkeşlər futboldan zövq aldılar.

- Bəzi qarşılaşmalarda gözlənilmədən vacib xallar itirdiz. Sizcə, bu oyuna qədər daha yaxşı çıxış edib çempionluğunuzu rəsmləşdirmək olardı?
- Mən və futbolçularım hər zaman yumruq kimi olmuşuq. Bəli, vacib xallar itirmişik. Amma heç kim deyə bilməz ki, biz meydanda əl-qolumuzu sallayıb məğlub olmuşuq. Yenildiyimiz oyunların əksəriyyətində meydanda üstün tərəf biz olmuşuq. Sadəcə, hesabda uduzmuşuq. Yetirmələrimə hər şeydən əvvəl mübariz olmağı aşılamışam.

- Matçın qəhramanı Emin Zamanov haqqında nə deyərdiz?
- Emin bizim üçün dəyərli oyunçudu. O, kapitan kimi də həmişə işinin öhtəsindən gəlir. "Qaradağ Lökbatan"la oyunda da komandanın lideri olduğunu göstərdi. Amma Emini xüsusi fərqləndirməzdim, qələbəni bütün futbolçular qazandı. Mənim üçün bütün oyunçularım birdi, hamısı əzizimdi.

- Üçüncü qoldan sonra futbolçularınız tez-tez özlərini yerə atır, oyunun tempini aşağı salırdılar...
- Söylədiklərinizlə razı deyiləm. Biz heç vaxt nə qorxaq futbol oynamışıq, nə də vaxt uzatmışıq. Sadəcə, 3-cü qoldan sonra rəqib təzyiqi artırdı, biz də məcbur olub daha çox müdafiəyə diqqət ayırdıq.

- Sonuncu turda "Araz Saatlı"yla qarşılaşacaqsız. Onlar autsayder olsa da, itirəcəkləri nəsə yoxdu. Son turda da "İmişli"ni məğlub etdilər. Saatlı təmsilçisinin sizə də başağrı olacağından çəkinmirsiz?
- Bütün rəqiblərimizə eyni gözlə baxır, hörmət edirik. "Şamaxı" üçün autsayder, lider anlayışı yoxdu. Bütün rəqiblərimiz güclüdü. "Şamaxı" üçün hələ çempionat bitməyib. Autsayderlə qarşılaşırıq deyə meydana arxayın çıxa bilmərik, bunu heç kim ağlından belə keçirmir. Yalnız  "Araz Saatlı"nı yenəndən sonra çempionluğumuzu rəsmiləşdirə bilərik. Qalib gəlmək üçün son saniyələrə kimi döyüşəcəyik.

- Artıq elita üçün planlar cızmağa başlamısız?
- Xeyr. Hələ çempionat bitməyib. Hazırda bütün məqsədimiz "Araz Saatlı" səddini keçməkdi.

- Ramiz Məmmədov "Şamaxı"da qalacaq?
- İndidən nəsə deyə bilmərəm.

ABDULLA İSMAYILOĞLU