"Neftçi" "O"nu tapmasa və ya AFFA prezidentinin CV-sini kim korlayıb?

CEYHUN ƏLİYEV


"Neftçi" Bojoviçi yola saldı. Daha doğrusu, "Neftçi" bu dəfə Bojoviçi yola saldı. Yox-yox, rəsmən bu mütəxəssisdən başqa hələ heç kim göndərilməyib. Amma "bu dəfə Bojoviçi yola saldı" da səhv ifadə deyil. Çünki daha əvvəl Mutu yola salınmışdı. Pakizə. Yola salınan Mutu ilə müqavilə müddəti tamamlanmamışdı. Ancaq yola salınmışdı. Bu isə o deməkdi ki, rumıniyalı mütəxəssisə qapını göstərmək üçün əvvəlcə "kompensasiya çemodanı"nı göstəriblər...


Gəlib çatdıq ilk suala: Mutunu Azərbaycana, daha dəqiq desək, "Neftçi"nin "sükanı arxası"na kim gətirib?


Suallar toplusu bununla tamamlanmır. Adrianı "ağ-qara" rəngə boyayan kim olubsa, buna görə kiminsə qarşısında cavab verdimi? Veribsə, kimin qarşısında? Bildiyim qədəri ilə "Neftçi"də Mutu ilə bir vaqonda yola salınan rəsmi nümayəndə olmadı.


Əgər Mutuya görə heç kim incidilmədisə, Bojoviç kiminsə kreslosunu laxlada bilərmi? Bu, ikinci sualdı. Özü də söhbət konkret bu məşqçilərin gəlişini tövsiyə edən yoldaş(lar)dan gedir ha! O yoldaş(lar) ki, dünənə qədər "Neftçi"nin Müşahidə Şurasının sədri, hazırki AFFA prezidenti Rövşən Nəcəfin faktiki olaraq futbol CV-sinin ilk səhifəsini əbədi olaraq qara rəngə boyadı. Hər halda, qarşıya qoyulan çempionluq və Kubokun qazanılması məqsədi bir yana, komandanın nə medala layiq görülməsi, nə də Konfrans Liqasına vəsiqə verən 4-cü yeri tuta bilməsinin tək adı fiaskodu! Və bu fiasko bütün hallarda, Rövşən Nəcəfin adına bağlanır...


İsveçdən gətirilən Yens Andersson bəlkə də kimlər üçünsə "günah keçisi" obrazını ifa efə bilər. Reallıq isə budu ki, nə Bojoviçi, nə də Mutunu o gətirib. Bax, indi "O" kimdirsə ortaya çıxarılmalı, gördüyü işin hesabatını verməlidi. Daha sonra "gələcək işlərində uğurlar diləyirik" paylaşımı ilə yola salınmamalıdı, konkret "işində buraxdığı nöqsanlara görə tutduğu vəzifədən azad edilir" möhürü ilə qovulmalıdı ki, sabah başqa ocaq başına gətirilməsin.


Nəhayət, son sual. Tarixinin ən yüksək büdcəsi ilə  avrokuboklardan da kənar qalan klubda əsl səbəbkar(lar) qalacaqsa, "ağ-qara" fanatlar nəyə ümid etsinlər?