“Qaradağ Lökbatan”ın baş məşqçisi: “Meydan sahiblərinin xal itirməsi möcüzə olar”

"Futbolda səhvlər qaçılmazdı. Biz də bu gün səhvlərimizin qurbanı olduq". Bu sözləri Sport24.az-a açıqlamasında "Qaradağ Lökbatan"ın baş məşqçisi Azər Həşimov deyib.

Gənc mütəxəssis məğlub olduqları oyunu şərh edib: "Matça yaxşı başladıq. Hesabı açdıq, maksimum sıx oynayıb, rəqibə boş ərazi verməməyə çalışdıq. Qapımıza təyin olunan penalti haqqında nəsə deyə bilmərəm. Epizoda yenidən baxmalıyam. Məni sevindirəm odur ki, "Şamaxı" 3-cü qolu vurandan sonra da həvəsdən düşməyib irəli atılmağımızdı. Çoxsaylı qol imkanlarımız olsa da, fürsəti boşa verdik. Futbolçularımdan razıyam. Meydanda iki rəqibdən biri qalib olmalıdı. Bu gün qonaqlar qələbə qazandı, onları təbrik edirəm. Çempion olmaq üçün nəzəri şanslarımız qalır. Amma gəlin, reallığı nəzərə alaq. Sonuncu turda "Şamaxı" doğma meydanda autsayder "Araz Saatlı"nı qəbul edəcək. Meydan sahiblərinin xal itirməsi möcüzə olar. Odur ki, çempionluq yarışında məğlub olduq. Sonuncu oyunumuzu səfərdə "Mingəçevir"ə qarşı keçirəcəyik. Nəticədən asılı olmayaraq 2-ci pillədə qərarlaşacağıq".

Həşimov həm elitada komanda sayının artırılmamasıyla bağlı, həm də gələcək karyerası barədə də fikirlərini bölüşüb: "İcraiyyə Komitəsi elitada komanda sayını dəyişmədi. Təbii ki, söz və səlahət sahibləri onlardı, qərarlarına hörmət edirəm. Gələcək planlara gəlincə, sonuncu matçı keçirib çempionatın bitməsini gözləyirik. Komandada qalıb-qalmamağım və növbəti mövsüm üçün hədəflər haqqında nəsə deyə bilmərəm. İyunun 10-da klub rəhbərliyiylə söhbətimiz olacaq. Bundan sonra bütün suallara aydınlıq gələcək".

ABDULLA İSMAYILOĞLU