Idman.biz
"Qarabağ"ın baş məşqçisi Qurban Qurbanov qarşıdakı matçda üç futbolçunun xidmətindən istifadə edə bilməyəcək.
Bu barədə İdman.Biz-ə Ağdam təmsilçisinin Kommunikasiya departamentinin rəhbəri Anar Hacıyev məlumat verib.
Bildirilib ki, Misli Premyer Liqasının birinci turundan təxirə salınan və bu gün Masazırda "Sabah"a qarşı keçiriləcək görüşdə itkilər zədə ilə bağlıdır.
"Qapıçı Şahruddin Məhəmmədəliyev, müdafiəçi Abbas Hüseynov və yarımmüdafiəçi Kadi Borges zədə səbəbindən oyunu buraxacaqlar. Komandada cəzalı futbolçu yoxdur", - deyə o əlavə edib.
Qeyd edək ki, hazırda "Qarabağ"dan iki xal geri qalan "Sabah" bu matçda qalib gələcəyi təqdirdə turnir cədvəlində liderliyə yüksələ bilər.
Yusif Sadıqlı
