Idman.biz
Türkiyənin "Qalatasaray" futbol komandası İngiltərənin "Arsenal" klubunun iki oyunçusu - Qabriel Martinelli və İtan Nvanerinin transferi üçün rəsmi təklif göndərib.
İdman.Biz xəbər verir ki, bu barədə türkiyəli jurnalist Haluk Yürekli məlumat verib. Onun sözlərinə görə, İstanbul təmsilçisi hər iki hücumameyilli futbolçu ilə maraqlanır və "Arsenal"la danışıqlara başlayıb.
Bildirilir ki, "Qalatasaray" Martinellini satınalma şərti ilə icarəyə götürmək istəyir və hazırda mümkün transfer məbləğinin aşağı salınması üzərində işləyir.
Nvaneri ilə bağlı vəziyyət isə bir qədər fərqlidir. "Arsenal" 19 yaşlı futbolçu üçün yüksək məbləğ tələb edir və bu tələbdən geri çəkilmir. "Qalatasaray" isə gənc yarımmüdafiəçini icarəyə götürmək variantını nəzərdən keçirir.
Martinelli və Nvanerinin gələcəyi "Arsenal"da aparılan heyət dəyişiklikləri fonunda qeyri-müəyyən olaraq qalır. London klubu yay transfer pəncərəsində heyətini gücləndirməklə yanaşı, bəzi futbolçuların satışından gəlir əldə etməyi də planlaşdırır.
Eyni zamanda "Arsenal"ın digər gənc futbolçusu Mayls Lyuis-Skellinin də adı mümkün transferlə hallanır. Lakin 19 yaşlı futbolçunun özü London klubunda qalmaq və əsas heyətdə yer uğrunda mübarizə aparmaq istəyir. "Arsenal" da onu aktiv şəkildə satmaq niyyətində deyil. Bununla belə, gözlənilən futbolçu satışları baş tutmasa, klubun transfer təkliflərinə münasibətinin dəyişə biləcəyi bildirilir.
Qeyd edək ki, Lyuis-Skelli ilə "Çelsi" və "Mançester Yunayted"in də maraqlandığı barədə məlumatlar yayılıb.
