Idman.biz
Fransanın PSJ futbol komandası "Parma"nın qapıçısı Dzion Suzukinin transferini yekunlaşdırmağa yaxındır.
İdman.Biz "Football Italia"ya istinadən xəbər verir ki, Paris təmsilçisi 23 yaşlı qapıçı üçün İtaliya klubu ilə 35 milyon avro (təxminən 68,6 milyon AZN) dəyərində paket üzrə razılığa yaxınlaşıb.
Transfer baş tutacağı halda Suzukinin PSJ-nin heyətində qalacağı hələ dəqiq deyil. Paris klubu onun "Yuventus"a icarəyə verilməsi variantını da nəzərdən keçirir. Bu məsələ Lukas Şevalyenin gələcəyindən asılı olacaq.
Mənbəyə görə, tərəflər bu detalı gələn həftə ərzində müzakirə edəcəklər. Şevalye PSJ-dən ayrılarsa, Suzuki Parisdə saxlanıla bilər. Əks halda, yaponiyalı qapıçının daha çox oyun praktikası qazanması üçün "Yuventus"a icarəyə göndərilməsi mümkündür.
PSJ daha əvvəl Suzuki üçün 33 milyon avroluq təklif göndərib. Sonrakı danışıqlarda paket 35 milyon avroya qədər artırılıb. "Yuventus" da qapıçı ilə maraqlansa da, transfer məbləği Turin klubu üçün yüksək hesab olunur.
