Idman.biz
Mərakeş futbolunun əfsanəvi siması Mustafa Hacı "Barselona"nın və İspaniya millisinin gənc ulduzu Lamin Yamal barədə diqqətçəkən fikirlər səsləndirib.
İdman.Biz xəbər verir ki, keçmiş yarımmüdafiəçi Yamalın milli komanda seçimini tənqid edib.
Hacının sözlərinə görə, Lamin Yamal İspaniya millisində çıxış etsə belə, ispan azarkeşlərindən görəcəyi sevgi heç vaxt mərakeşlilərin ona verə biləcəyi sevgi səviyyəsində olmayacaq. O vurğulayıb ki, Yamal Mərakeşi seçsəydi, vəziyyət tamamilə fərqli ola bilərdi və bu seçim böyük fürsətin itirilməsi deməkdir.
Mustafa Hacı həmçinin İspaniya mediasına istinad edərək bildirib ki, bəzi ispan jurnalistlər belə Yamalı Pedri qədər sevmədiklərini deyirlər. Onun fikrincə, bu yanaşma gənc futbolçunun verdiyi qərarın doğru olmadığını açıq şəkildə göstərir.
Qeyd edək ki, Lamin Yamal Mərakeş əsilli olmasına baxmayaraq, İspaniya millisinin formasını seçib və son dövrlərdə Avropa futbolunun ən böyük istedadlarından biri kimi qiymətləndirilir.
