Idman.biz
Lamin Yamalın 10 nömrəli forması "Barselona" mağazalarında satış rekordu qırıb.
İdman.biz xəbər verir ki, bu həftə rəsmi olaraq 10 nömrəyə sahib çıxan 18 yaşlı futbolçunun soyadı yazılmış köynək klubun rəsmi mağazalarında bir gün ərzində ən çox satılan məhsul olaraq tarixə düşüb.
"Culemania"nın məlumatına görə, "Nike" dünya üzrə ilk partiya üçün 70 min ədəd forma sifariş edib. Bu formalar 170 ölkəyə göndəriləcək. İlkin satışdan əldə olunacaq gəlirin təxminən 10 milyon avro olacağı proqnozlaşdırılır. Klubun rəsmi mağazalarına çatdırmaq üçün yaxın aylarda yeni tədarüklər də planlaşdırılır.
Yamalın soyadı yazılmış uşaq forması 114,99 avroya, böyüklər üçün versiyası isə 134,99 avroya satılır. Həmçinin futbolçuların geyindiyinə bənzər daha eksklüziv versiya da mövcuddur və onun qiyməti 184,99 avrodur. Ən çox satılanlar ilk iki model olsa da, sonuncu versiyanın da, xüsusilə asiyalı turistlər arasında öz alıcıları var.
Qeyd olunur ki, "Barselona"nın rəsmi mağazalarından birində cəmi iki gün ərzində 400-dən çox forma satılıb. Mağaza işçiləri bu satış tempini "həqiqətən çılğınlıq" adlandırıblar, lakin bu, "satılıb" lövhəsi asmaq üçün kifayət etməyib.
Klubun merçandayzinqinə cavabdeh olan əsas şirkət BLM artıq 2025/26 mövsümündə tarixi gəlir rekordu qeydə alındığını açıqlayıb.
İdman.biz
