Idman.biz
İspaniya La Liqasının 29-cu turu çərçivəsində keçirilən möhtəşəm Madrid derbisi "Real"ın 3:2 hesablı qələbəsi ilə başa çatıb. "Santyaqo Bernabeu" stadionunda baş tutan və Xose Munuera Monteronun idarə etdiyi qarşılaşma gərginliyi və gözlənilməz hadisələrlə yadda qalıb.
İdman.Biz xəbər verir ki, oyunda hesabı qonaqlar açıblar. Matçın 33-cü dəqiqəsində "Atletiko"nun hücumçusu Ademola Lukman rəqib qapısına yol tapıb. İkinci hissəyə sürətli başlayan "kral klubu" 52-ci dəqiqədə Vinisius Juniorun penaltidən vurduğu qolla tarazlığı bərpa edib. Cəmi üç dəqiqə sonra Federiko Valverde "Real"ı önə keçirsə də, "atletlər" 67-ci dəqiqədə Nauel Molinanın sayəsində hesabı bərabərləşdiriblər (2:2).
Oyunun qəhrəmanı olan Vinisius Junior 72-ci dəqiqədə dublunu rəsmiləşdirərək meydan sahiblərinə qələbə qazandırıb. Matçın sonları "Real" üçün çətin keçib - 77-ci dəqiqədə Federiko Valverde rəqibin ayağını tapdaladığı üçün birbaşa qırmızı vərəqə alaraq meydandan qovulub. Azlıqda qalan Alvaro Arbeloanın yetirmələri üstünlüklərini sona qədər qoruya biliblər.
Bu qələbədən sonra "Real" xallarını 69-a çatdıraraq turnir cədvəlində ikincici pillədəki mövqeyini möhkəmləndirib. "Atletiko" isə 57 xalla dördüncü sırada qalıb. Növbəti turda "Real" aprelin 4-də səfərdə "Malyorka" ilə qarşılaşacaq, Dieqo Simeonenin komandası isə həmin gün doğma meydanda "Barselona"nı qəbul edəcək.
23:37
İspaniya La Liqasının 29-cu turu çərçivəsində keçirilən "Atletik" - "Betis" qarşılaşması ev sahiblərinin 2:1 hesablı qələbəsi ilə başa çatıb.
İdman.Biz xəbər verir ki, "Atletik" oyuna fəal başlayıb və artıq 25-ci dəqiqədə müdafiəçi Dani Vivian hesabı açıb. İlk hissənin sonuna yaxın, 45-ci dəqiqədə yarımmüdafiəçi Oyan Sanset komandasının üstünlüyünü ikiqat artırıb. Qonaqlar oyunun sonlarına yaxın təzyiqi artırsalar da, yalnız bir qol vura biliblər - 75-ci dəqiqədə Pablo Fornals fərqlənərək matçda son nöqtəni qoyub.
Bu qələbədən sonra "Atletik" xallarının sayını 38-ə çatdıraraq turnir cədvəlində doqquzuncu pillədə qərarlaşıb. "Betis" isə məğlubiyyətə baxmayaraq, 44 xalla beşinci yerdəki mövqeyini qoruyub. Növbəti turda "Betis" aprelin 4-də doğma meydanda "Espanyol"u qəbul edəcək. "Atletik" isə bir gün sonra səfərdə "Xetafe"nin qonağı olacaq.
21:51
İspaniya La Liqasının 29-cu turu çərçivəsində keçirilən "Selta" - "Alaves" qarşılaşması mövsümün ən dramatik oyunlarından biri ilə yadda qalıb. Viqoda baş tutan matçda qonaqlar inanılmaz iradə nümayiş etdirərək 4:3 hesablı qələbə qazanıblar.
İdman.Biz xəbər verir ki, oyunun ilk hissəsi "Selta"nın tam üstünlüyü ilə keçib. Meydan sahibləri Ferran Xutqla və Uqo Alvaresin qolları ilə hesabda 3:0 öndə olsalar da, ikinci hissədə "Alaves" meydanda əsl fırtına qoparıb. Qonaqların heyətində Toni Martines dubl müəllifi olub, digər qolları isə Anxel Peres və Abderrahman Rebbaç rəqib qapısından keçiriblər.
Bu qələbə sayəsində xallarının sayını 31-ə çatdıran "Alaves" turnir cədvəlində 16-cı pilləyə yüksələrək düşmə zonasından uzaqlaşıb. "Selta" isə 41 xalla altıncı yerdə qərarlaşıb.
Qeyd edək ki, Viqo təmsilçisi bu məğlubiyyətlə Avrokubok zonasındakı mövqeyini ciddi təhlükəyə atıb.
19:06
İspaniya La Liqasının 29-cu turu çərçivəsində keçirilən "Barselona" - "Rayo Valyekano" matçı meydan sahiblərinin minimal hesablı qələbəsi ilə başa çatıb. Qarşılaşmada azarkeşlər cəmi bir qolun şahidi olublar.
İdman.Biz xəbər verir ki, oyunun taleyini 24-cü dəqiqədə vurulan qol həll edib. "Barselona"nın müdafiəçisi Ronald Arauxo rəqib qapısına yol taparaq komandasına vacib üç xalı qazandırıb.
Bu qələbədən sonra "Barselona" xallarının sayını 73-ə çatdıraraq turnir cədvəlində liderliyini davam etdirir. Hazırda 32 xalı olan "Rayo Valyekano" isə 14-cü pillədə qərarlaşıb.
Növbəti turda "Rayo Valyekano" aprelin 3-də doğma meydanda "Elçe"ni qəbul edəcək. "Barselona" isə bir gün sonra səfərdə çempionluq yolundakı ən ciddi rəqiblərindən biri olan Madrid "Atletiko"sunun qonağı olacaq.
