Lent.az
UEFA Konfrans Liqasında 1/4 final mərhələsinin cavab oyunlarından sonra yarımfinala vəsiqə qazanan komandalar bəlli olub.
Lent.az xəbər verir ki, Niderlandın AZ klubu doğma meydanda Donetsk "Şaxtyor"u ilə 2:2 hesablı heç-heçə edib. Lakin ilk oyunun nəticəsinə görə (ümumi hesab 2:5) Ukrayna təmsilçisi yarımfinala yüksəlib.
Fransanın "Strasburq" komandası Almaniyanın "Maynts 05" klubunu 4:0 hesabı ilə darmadağın edərək ümumi hesabda 4:2 üstünlüklə növbəti mərhələyə adlayıb.
Yunanıstanın AEK klubu İspaniyanın "Rayo Valyekano" komandasını 3:1 hesabı ilə məğlub etsə də, ilk oyundakı məğlubiyyətə görə (ümumi hesab 3:4) mübarizəni dayandırıb və yarımfinala İspaniya təmsilçisi yüksəlib.
İtaliyanın "Fiorentina" klubu isə İngiltərənin "Kristal Pelas" komandasına 2:1 hesabı ilə qalib gəlsə də, ümumi hesabda 2:4 geridə qaldığı üçün turnirlə vidalaşıb. Yarımfinala İngiltərə təmsilçisi yüksəlib.
Beləliklə, UEFA Konfrans Liqasında yarımfinalda "Şaxtyor", "Strasburq", "Rayo Valyekano" və "Kristal Pelas" komandaları mübarizə aparacaq.
