Sport24.az
"Mövsümü 5-ci pillədə başa vuracağımız dəqiqləşdi. Uzun fasilədən sonra peşəkar liqaya qayıtmağımızı nəzərə alsaq, ilk "5-lik"də qərarlaşmağımızı uğur saymaq olar". Bu sözləri Sport24.az-a açıqlamasında "Karvan"ın baş məşqçisi Kənan Kərimov deyib.
Yevlax təmsilçisinin baş məşqçisi heyətin kasad olması səbəbindən çempionluq uğrunda mübarizədən kənar qaldıqlarını da vurğulayıb: "Mövsümün əvvəlində qarşımıza çempionluq hədəfi qoymuşduq. Pis də çıxış etmirdik. Amma ehtiyat qüvvəmizin olmaması işimizi çətinə saldı. Əsas heyətdən cəza, zədə, xəstəlikdən dolayı itirdiyim oyunçuların yerini doldura bilmirdim. Elə olurdu ki, 12-13 futbolçu ilə hazırlıq keçib matçlara çıxırdıq. İstənilən halda döyüşdük. Qarşıda bizi səfərdə "İrəvan"la oyun gözləyir. Həmin görüşdə də 3 xalı hədəfləyib, çempionatı qələbəylə başa vurmaq istəyirik".
Qeyd edək ki, "Karvan" dünən doğma meydanda "Mingəçevir"i 1:0 məğlub edib.
ABDULLA İSMAYILOĞLU
