Report.az
İngiltərə Premyer Liqasının 22-ci turunda "Mançester Siti" "İpsviç"i qəbul edib.
"Report" xəbər verir ki, "Portman Road"da baş tutmuş matçı baş hakim Semuel Berrot idarə edib.
Oyunda hesab 27-ci dəqiqədə açılıb: ingiltərəli Fil Foden "şəhərlilər"in ilk qolunu vurub. Növbəti qol cəmi üç dəqiqə sonra qeydə alınıb: Mateo Kovaçiç Fil Fodenin ötürməsindən maksimum yaralanıb. Birinci hissədə sonuncu qol 42-ci dəqiqədə vurulub: Fil Foden Kevin De Brüynenin ötürməsindən sonra dubla imza atıb.
Xosep Qvardiolanın yetirmələrinin qol yağışı ikinci hissədə də davam edib. 49-cu dəqiqədə Ceremi Doku vurulmuş qolların sayını 4-ə çatdırıb. Belçikalıya dəqiq ötürməni onun həmvətəni Kevin De Brüyne verib. 57-ci dəqiqədə qonaqların bombardiri Erlinq Holann (assist: Doku) da özündən söz edib. Matçda son nöqtəni isə Kovaçiçin ötürməsindən sonra Ceyms Makti (69") qoyub: "İpsviç" – 0, "Mançester Siti" – 6.
Beləliklə, bu qələbə ilə xallarını 38-ə çatdıran "şəhərlilər" bu göstəricidə "Nyukasl"la bərabərləşib və vurulmuş-buraxılmış topların nisbətinə görə turnir cədvəlinin ilk dördlüyünə daxil olublar. Komandaların ən yaxın təqibçisi 37 xala malik "Çelsi"dir (bir oyun əskik). Növbəti turda "Mançester Siti" "Çelsi"ni qonaq edəcək.
"İpsviç" isə 18-ci pillədə qərarlaşıb. Liqada qalmaq uğrunda mübarizə aparan "traktorçular"ın cəmi 16 xalı var. Növbəti turda autsayderi çempionatın lideri "Liverpul" sınağa çəkəcək.
Xatırladaq ki, daha əvvəl "Mançester Yunayted" öz meydanında "Brayton"a məğlub olmuşdu. Eyni aqibətlə "Tottenhem" və "Sauthempton"da üzləşib.
