Idman.biz
İngiltərə millisinin və Səudiyyə Ərəbistanının "Əl-Əhli" futbol komandasının hücumçusu İvan Toni barəsində zorakılıq ittihamı ilə məhkəmə prosesi başlayıb.
İdman.Biz Britaniya mətbuatına istinadən xəbər verir ki, 30 yaşlı futbolçu Londondakı gecə klublarından birində baş verən insidentə görə hakim qarşısına çıxıb.
İttiham tərəfinin məlumatına əsasən, hadisə 2025-ci il dekabrın 6-da Londonun Soho rayonunda yerləşən əyləncə məkanında qeydə alınıb.
İddia olunur ki, Toni Saber da Silva adlı şəxslə mübahisə zamanı ona baş və yumruq zərbələri endirib. Nəticədə qarşı tərəfin burnu və barmağı sınıb.
Futbolçu isə məhkəmədə ittihamları rədd edərək özünü təqsirli bilməyib.
Məhkəmə prosesinin növbəti əsas mərhələsinin 2028-ci il iyunun 12-də başlaması nəzərdə tutulur. Bu tarix futbol üzrə Avropa çempionatının keçirildiyi dövrə təsadüf edir. Prosesin üç-dörd gün davam edəcəyi gözlənilir.
Toni məhkəmənin qərarı ilə heç bir əlavə şərt qoyulmadan zaminə buraxılıb.
Qeyd edək ki, hücumçu 2024-cü ildə İngiltərənin "Brentford" futbol komandasından "Əl-Əhli"yə transfer olunub. O, İngiltərə millisinin heyətində 10 oyun keçirib və bir qol vurub.
