İlkin Qırtımov: "Üç xal əldə edən tərəf psixoloji üstünlük qazanacaq"

"Komanda olaraq meydana çıxan və ehtiyatda qalan hər futbolçu qalibiyyətə inanırdı". Bunu Sport24.az-a açıqlamasında "Kəpəz"in futbolçusu İlkin Qırtımov deyib.

34 yaşlı müdafiəçi "Turan Tovuz"a 5:2 hesabı ilə qalib gəldikləri Premyer Liqanın XIX tur matçı ilə bağlı fikirlərini bölüşüb:

"Üç xal üçün Tovuza getmişdik. Hesaba baxmayaraq rahat qələbə qazandığımızı deyə bilmərəm. Qarşılaşma son dəqiqələrə kimi gərgin keçdi".

Gəncə təmsilçisi hazırda çempionatda 14 xalla 9-cu pillədə qərarlaşıb. 10-cu sıradakı "Səbail"in 12 xalı var.

Qırtımov XX turda "dənizçilər"ə qarşı keçirəcəkləri matç haqqında da danışıb:

"Səbail"lə görüşdən əvvəl belə döyüşkən oyunla qalib gəlməyimiz çox yaxşı oldu. Kollektivin özünə inamı baxımından Bakıdakı qarşılaşma da bizim üçün önəmlidir. Hamımız bunu dərk edirik. Lakin mənim fikrimcə, bu oyun turnir cədvəlindəki mövqe baxımından həlledici olmayacaq. Çünki Premyer Liqanın III dövrəsi hələ yeni başlayıb və qarşıdakı çoxlu matçlarımız var. Təbii ki, üç xal əldə edən tərəf psixoloji üstünlük qazanacaq".

Ötən ilin iyulunda "sarı-göylər"ə keçən futbolçu noyabrda dizindən əməliyyat olduğu üçün bir müddət komandasına kömək edə bilməyib.

Müdafiəçi tezliklə yaşıl meydanlara qayıtmaq istədiyini söyləyib:

"Əməliyyatdan sonra məşqlərə başlamışam. "Turan Tovuz"la görüşdə ehtiyatda idim. Tezliklə tam bərpa olunmağa və komandama kömək etməyə çalışıram".

Qeyd edək ki, yanvarın 25-də keçiriləcək "Səbail" - "Kəpəz" oyunu saat 16:00-da başlayacaq.