İdman.biz
Minifutbol üzrə Azərbaycan yığması Avropa çempionatının 1/4 finalına yüksəlib.
İdman.biz xəbər verir ki, bu mərhələdəki rəqib millimizə yaxşı tanış Qazaxıstan olacaq.
Ardıcıl 4-cü qələbə
Bosniya və Herseqovinanın paytaxtı Sarayevoda keçirilən turnirdə futbolçularımız ardıcıl 4-cü qələbəsini qazanıblar. Qrup mərhələsində Belçika (3:0), İtaliya (2:1) və Fransanı (3:1) Elşad Quliyevin komandası 1/8 finalda da ciddi müqavimətlə üzləşməyib.
Millimiz bir il əvvəl dünya çempionatının pley-offunda da Bolqarıstanla qarşılaşmışdı. Birləşmiş Ərəb Əmirliyində keçirilən yarışda rəqibi 3:1 hesabı ilə məğlub edən yığmamız bu dəfə eyni hesabla qələbəni bayram edib. Komandamızın heyətində Ramiz Çovdarov, Təmkin Xəlilzadə və Rəvan Kərimov fərqlənib. Son turnirin bürünc mükafatçısı olan bolqarlar çempionatla erkən vidalaşıblar.
Revanş şansı
Növbəti rəqib minifutbol azarkeşlərinə çox yaxşı tanışdır. Millimizin 1/4 finaldakı rəqibi Qazaxıstanla son 2 turnirin pley-offunda üz-üzə gəlmişik. 2022-ci ildə Slovakiyada keçirilən Avropa çempionatında yığmamız bu rəqibi yarımfinalda 3:2 hesabı ilə məğlub edib. Komandalar bu dəfə daha erkən qarşılaşacaqlar.
Yığmalar arasında növbəti qarşılaşma ötənilki dünya çempionatına təsadüf edib. Növbəti dəfə mundialın 1/2 finalda qarşılaşan komandaların duelində qazaxlar qələbə qazanıblar. Maraqlıdır ki, onlar eyni hesabla revanş ala biliblər (3:2). İndi növbə Azərbaycan yığmasındadır. Revanş sayəsində millimiz yarımfinala vəsiqə əldə edəcək.
Tutulu qorumaq mümkün olacaqmı?
Millimiz Bosniya və Hersoqovinada titulu qorumaq istəyirsə, ilk növbədə Qazaxıstan səddini aşmalıdır. Çempionatda favoritlərin görüşünü erkən final da adlandırmaq olar. Avropa çempionu ilə son dünya çempionatının gümüş mükafatçısı arasında oyun böyük maraqla gözlənilir.
Qazaxıstan artıq çempionatda məğlubiyyət acısı yaşayıb. Sabahkı rəqibimiz qrup mərhələsində Yunanıstana uduzub. Amma növbəti qarşılaşmada İngiltərənin qapısından 7 cavabsız top keçirən qazaxlar bu məğlubiyyətin təsadüfi olduğunu sübuta yetiriblər.
Qələbə sayəsində yığmamız titul qorumaq istiqamətində mühüm addım atacaq. Amma final gedən yol heç də hamar olmayacaq. Son dünya çempionu Rumıniyanın yarımfinala yüksəlmə ehtimalı yüksək olduğu üçün növbəti mərhələdə Azərbaycan – Qazaxıstan cütünün qalibi çətin sınaq gözləyir.
Öncə Qazaxıstan, sonra Rumıniya...
İdman.biz
