Sport24.az
"Mövsümün son oyunu bizim üçün böyük ölçüdə əhəmiyyət kəsb etməsə də, hər halda qərb derbisi idi. İstəyirdik son matçda qələbə qazanıb azarkeşlərimizi sevindirək. Heyətdə yetərincə itkilərin olmasına baxmayaraq, yaxşı oyun sərgilədik. Sadəcə, ani bir səhv qapımızda qolla nəticələndi". Bu sözləri Sport24.az-a açıqlamasında "Kəpəz"in futbolçusu Əli Səmədov deyib.
Gəncəli futbolçu mövsümlə bağlı da fikirlərini bölüşüb: "Çempionata yaxşı başlamasaq da, sonradan komanda öz oyununu tapdı. Əsas odur ki, elitada yerimizi qoruduq. Könül istərdi ki, bir qədər də yuxarı pillələrdə qərarlaşaq. Amma alınmadı".
Səmədov gələcək karyerası ilə bağlı da danışıb: "Müqaviləm gələn ay bitir. Bir neçə günə rəhbərliklə görüşüb müzakirə aparacağıq. Öz istəyimə qalsa, doğma şəhərimin komandasının formasını geyinmək istəyirəm. Amma danışıqlardan çox şey asılıdı. "Kəpəz"in gələn mövsüm üçün hədəfi barədə danımaq, nəsə söyləmək çətindi. Bu il min bir əziyyətlə istəyimizə nail olduq. Düşünürəm ki, "sarı-göylər"in hədəfi sponsor məsələsindən asılı olacaq. Ümid edirəm ki, "Kəpəz"in adına layiq sponsor olacaq".
POLAD AZƏR
