Idman.biz
Çexiya futbol millisinin baş məşqçisi Miroslav Koubek Dünya Çempionatları tarixində komandaya rəhbərlik edən ən yaşlı mütəxəssis olub.
İdman.Biz xəbər verir ki, DÇ-2026-nın A qrupunda Cənubi Koreya ilə keçirilən oyun zamanı çexiyalı mütəxəssisin 74 yaş 9 ayı olub.
Koubek bununla turnirin açılış matçında Cənubi Afrika Respublikasının millisini meydana çıxaran Huqo Broosun rekordunu yeniləyib. Belçikalı mütəxəssis Meksika ilə qarşılaşma zamanı 74 yaş 2 aylıq idi.
Lakin Koubekin rekordu da uzun müddət qüvvədə qalmayacaq. Kurasao millisi DÇ-2026-da ilk oyununa çıxarkən komandaya 78 yaşlı Dik Advokat rəhbərlik edəcək.
1947-ci il sentyabrın 27-də anadan olan niderlandlı mütəxəssisin bu ilin sentyabrında 79 yaşı tamam olacaq. Beləliklə, Advokat Dünya Çempionatları tarixində komandaya rəhbərlik edən ən yaşlı məşqçiyə çevriləcək.
Qeyd edək ki, əvvəlki rekord DÇ-2010-da Yunanıstan millisini 71 yaş 317 günlük olarkən meydana çıxaran Otto Rehhagelə məxsus idi.
