Divok Oriqi karyerasını başa vurdu

Belçika milli komandasının keçmiş hücumçusu Divok Oriqi karyerasını başa vurub.

Lent.az xarici KİV-ə istinadla xəbər verir ki, bu barədə 31 yaşlı futbolçu rəsmi sosial media hesabında paylaşım edib.

"Bir futbolçu olaraq bu oyundakı məqsədimi həyata keçirdim. Uşaqlıq arzularımı gerçəkləşdirdim. Ən böyüK meydanlarda oynadım və ən böyük kubokları qazandım. Bütün bunlara görə Tanrıya şükür edirəm.

Parlamağıma kömək edən dünyanın hər yerindən olan azarkeşlərə təşəkkür edirəm. Birlikdə yaratdığımız hər unudulmaz an, hər qol, tarixə düşən hər hadisə əbədi olaraq bizim olacaq. Yanımda olan bütün klublara, məşqçilərə və komanda yoldaşlarıma təşəkkür edirəm.

Siz məni təkcə meydanda deyil, meydandan kənarda da formalaşdırdınız. Ailəmə və mənə ən yaxın olan insanlara...

Siz olmasaydınız, bu gün olduğum insan ola bilməzdim. Sizə sonsuz minnətdaram. Missiya tamamlandı. İndi növbəti missiyama doğru addımlayıram. Bu səyahətin davamı gələcək... Sevgilərlə", - o paylaşımında qeyd edib.

Qeyd edək ki, D.Oriqi karyerası boyunca "Liverpul", "Milan", "Lill", "Volfsburq" kimi komandalarda çıxış edib. 371 rəsmi oyunda meydana çıxan hücumçu bu qarşılaşmalarda 70 qol vurub və 28 məhsuldar ötürmə edib.

Onun karyerasının yüksəliş dövrü isə 2014-2022-ci illərdə "Liverpul" forması ilə çıxışı zamanı olub. O, İngiltərə klubunda ümumilikdə 6 titul qazanıb.