Idman.biz
Kiyev "Dinamo"sunun kapitanı Andrey Yarmolenkonun UEFA Konfrans Liqasının III təsnifat mərhələsində "Qarabağ"la cavab oyununda iştirak ərizəsində yer almamasının səbəbi açıqlanıb.
İdman.Biz xəbər verir ki, ukraynalı jurnalist Andrey Piskun təcrübəli futbolçunun komanda ilə birlikdə Bakıya gəldiyini və oyuna hazır olduğunu bildirib.
İddialara görə, Yarmolenko oyundan əvvəl keçirilən taktiki toplantıda baş məşqçi İqor Kostyukun onu start heyətində meydana buraxmağı planlaşdırmadığını öyrənib. Bu qərardan narazı qalan futbolçu stadiona getməyərək oteldə qalmaq qərarına gəlib.
Qeyd edək ki, "Dinamo" ilk oyunda "Qarabağ"a 1:0 hesabı ilə qalib gəlsə də, Bakıdakı cavab görüşündə 0:2 hesabı ilə məğlub olaraq turnirdə mübarizəni dayandırıb. Yarmolenko hər iki qarşılaşmada iştirak etməyib.
