Ekvador Futbol Federasiyası (FEF) hakim köməkçisinin üzünə daş ataraq ona ağır xəsarət yetirən Con Mişel Perlasa Salası səkkiz il müddətinə futboldan kənarlaşdırıb.
İdman.Biz xəbər verir ki, hadisə oktyabrın 17-də "Siyudad de Yantsasa" və "Rio Aquariko" komandaları arasında keçirilən "Ascenso Nacional 2026" turnirinin qrup mərhələsinin oyununda baş verib.
Qarşılaşmanın 96-cı dəqiqəsində ehtiyat oyunçular skamyasından meydana daş atan Perlasa hakim köməkçisi Lenin Covanni Oxeda Nunyesin üz nahiyəsinə xəsarət yetirib. Nəticədə oyun yarımçıq dayandırılıb.
Hücum nəticəsində ciddi xəsarət alan hakim köməkçisi əməliyyat olunub və 60 günlük əmək qabiliyyətsizliyi barədə tibbi rəy alıb.
FEF-in İntizam Komissiyası futbolçunu oyun rəsmisinə qarşı fiziki zorakılıqda təqsirli bilib. Qərara əsasən, Perlasa 2034-cü il oktyabrın 19-dək futbol fəaliyyəti ilə bağlı bütün işlərdən kənarlaşdırılıb. Federasiya cəzanın bütün dünyada tətbiq olunması üçün FIFA-ya müraciət edəcəyini də açıqlayıb.
Hadisəyə görə "Siyudad de Yantsasa" klubuna da sanksiya tətbiq edilib. Komanda futbolçusunun davranışına və ev sahibi kimi təhlükəsizlik öhdəliklərini yerinə yetirməməsinə görə 2 000 dollar (3 400 manat) cərimələnib. Bundan əlavə, klub hakim köməkçisinin tibbi xərcləri üçün 4 369,73 dollar (7 428,54 manat) ödəməlidir.
Ekvador təmsilçisi növbəti üç ev oyununu Yantsasa Bələdiyyə Stadionunda keçirə bilməyəcək.