Idman.biz
Cənubi Afrika Respublikası(CAR) millisinin ABŞ-yə səfər üçün vizaları rəsmiləşdirilib və komanda iyunun 1-də dünya çempionatına hazırlıq məqsədilə Meksikaya yollanmalıdır.
İdman.Biz xəbər verir ki, bu barədə CAR-ın idman, incəsənət və mədəniyyət naziri Qeyton Makkenzi "X" sosial şəbəkəsində məlumat verib.
Bir gün əvvəl komandanın bazar gününə planlaşdırılan uçuşu təxirə salınmışdı. Buna səbəb bir neçə futbolçu və nümayəndə heyətinin üzvünün vizalarını ala bilməməsi olmuşdu.
"Bütün milli komanda üzvləri ABŞ-yə səfər üçün vizalarını alıblar. Köməkçi məşqçi, komandanın həkimi, təhlükəsizlik xidmətinin rəhbəri və bir analitik isə hələ də viza gözləyirlər", – deyə Makkenzi yazıb.
Nazir daha əvvəl təxirə salınmış uçuşla bağlı vəziyyəti "biabırçı və açıq-aşkar ədalətsiz" adlandırmışdı.
Qeyd edək ki, CAR millisi 2026-cı il dünya çempionatının qrup mərhələsində Meksika, Çexiya və Koreya Respublikası yığmaları ilə qarşılaşacaq.
10:35
Cənubi Afrika Respublikası(CAR) Futbol Assosiasiyası milli komandanın 2026-cı il dünya çempionatında iştirak etmək üçün Meksikaya uçuşunun gecikdiyini açıqlayıb.
İdman.Biz xəbər verir ki, buna səbəb bir sıra futbolçuların və nümayəndə heyətinin rəsmi üzvlərinin viza problemləri olub. Bu səbəbdən yığma əvvəlcədən planlaşdırılan tarixdə Şimali Amerikaya yollana bilməyib.
Assosiasiyadan bildirilib ki, vəziyyətin həlli istiqamətində gecə-gündüz iş aparılır və komandanın mümkün qədər tez turnirə yollanması üçün bütün zəruri tədbirlər görülür.
Yola düşənədək CAR millisi məşqlərini Yohannesburqda davam etdirəcək.
Qeyd edək ki, 2026-cı il dünya çempionatı iyunun 11-dən iyulun 19-dək ABŞ, Meksika və Kanadada keçiriləcək. Qrup mərhələsində CAR yığmasının rəqibləri Meksika, Çexiya və Koreya Respublikası milliləri olacaq.
