Sport24.az
"Uzun müddət qələbə qazana bilmirdik və Uğursuzluğa son vermək istəyirdik. Şükürlər olsun ki, buna nail olduq. Sumqayıt səfərində həm baxımlı oyun sərgilədik, həm də qalib gəldik". Bu sözləri Sport24.az-a açıqlamasında "Səbail"in futbolçusu Cabir Əmirli deyib.
28 yaşlı cinah müdafiəçisi "Sumqayıt"a 2:0 hesabı ilə qalib gəldikləri Premyer Liqanın XIX tur oyunu ilə bağlı fikirlərini bölüşüb:
"Kollektiv fasilə dönəmində yaxşı hazırlıq prosesi keçib. Təəssüfki, dekabrın sonunda əməliyyat olduğum üçün komandama kömək edə bilmirəm. Amma yanlarında olaraq mənəvi dəstəyimi əsirgəmirəm. "Sumqayıt"la matçdakı 3 xal bizim üçün çox vacib idi".
Əmirli bu gün doğma meydanda "Kəpəz"ə qarşı keçirəcəkləri XX turun qarşılaşması haqqında da danışıb:
"İndi komandamızı qarşıda daha bir çətin sınaq gözləyir. "Kəpəz"lə oyun həm bizim, həm də onlar üçün vacib görüşdür. İnşallah, bu oyunda da uğurlu nəticə qazanıb azarkeşlərimizi sevindirərik. Bu matçın məsuliyyətini bütün futbolçular dərk edir. Bunun üçün də tam gücümüzlə hazırlaşmışıq".
Qeyd edək ki, bu gün "ASCO Arena"da baş tutacaq "Səbail" - "Kəpəz" oyunu saat 16:00-da başlayacaq.
