Idman.biz
İspaniyanın "Barselona" komandası Andreas Kristensenin diz zədəsi ilə bağlı uzunmüddətli yoxluğunu rəsmi şəkildə qeydiyyata almağa hazırlaşdığı bildirilir.
İdman.Biz "Sport" nəşrinə istinadla xəbər verir ki, danimarkalı müdafiəçinin dörd aydan artıq müddətə meydanlardan kənarda qalacağı gözlənilir.
Hələlik yekun qərar verilməsə də, klub bazardakı variantları açıq saxlamaq üçün ilin sonuna qədər zəruri sənədləşməni tamamlamağa meyllidir. "Barselona" mümkün həll yollarını təhlil edir və uyğun fürsət yaranarsa müdafiə xəttinə gücləndirməyi planlaşdırır.
Baş məşqçi Hansi Flik vəziyyətdən xüsusilə narahatdır. Alman mütəxəssis daha əvvəl Ronald Arauxo ətrafındakı qeyri-müəyyənliyə baxmayaraq idman şöbəsi ilə birlikdə bazara girməmək qərarına gəlmişdi. Lakin Kristensenin zədəsi müdafiədə riski əhəmiyyətli dərəcədə artırıb. Flikin fikrincə, fevraldan sonra baş verə biləcək hər hansı yeni müdafiə itkisi klubun operativ reaksiya verməsinə imkan qoymaya bilər.
Xüsusilə cinah müdafiəçiləri mövqeyində vəziyyət həssasdır, çünki əsas oyunçuların alternativləri azdır. Flik artıq resursları bölüşdürməyə məcbur qalıb - Erik Qarsiyanı bir neçə mövqedə istifadə edib və Cerard Martini sol tərəf mərkəz müdafiəçisi kimi oynadıb. Cinahlarda hər hansı yeni zədə komandanı ciddi şəkildə zəiflədə bilər.
"Barselona"nın maliyyə manevr imkanları maaş limiti səbəbindən məhduddur. Lakin Kristensenin uzunmüddətli yoxluğunun qeydiyyata alınması klubun onun maaşının 80 faizinə qədərindən istifadə etməsinə imkan verəcək. Bu isə yanvar ayında keyfiyyətli icarə transferi üçün həlledici ola bilər. Axtarılan ideal profil həm mərkəz müdafiəçisi, həm də cinah müdafiəçisi kimi oynaya bilən, sol ayaqlı və ya sol tərəfdə rahat çıxış edən oyunçudur.
